සීතාවක ප්රාදේශීය සභාවේ සභාපතිවරයා සහ උප සභාපතිවරයා තෝරා පත්කර ගැනීම සඳහා රහස් ඡන්දයක් පැවැත්වීම වැළැක්වීම සඳහා අතුරු නියෝගයක් ඉල්ලා අභියාචනාධිකරණය හමුවේ රිට් පෙත්සමක් ගොනු කර තිබෙනවා.
මෙම පෙත්සම ගොනු කර ඇත්තේ සභාවේ බහුතර බලය හිමි විපක්ෂය නියෝජනය කරන ප්රාදේශීය සභා මන්ත්රීවරුන් විසින්.
තමන්ට කවුන්සිලයේ බහුතරය හිමි බවටයි එම ප්රාදේශීය සභා මන්ත්රීවරුන් පෙත්සම මගින් සඳහන් කළේ.
ජුනි 17 වැනි දින පැවති මංගල රැස්වීමේ දී රහස් ඡන්දයක් පැවැත්වීමට කොමසාරිස් සාරංගිකා ජයසුන්දර මහත්මිය ගත් තීරණයට විරෝධය පළකරමින් මන්ත්රීවරුන් 24 දෙනකු සභා ගර්භයෙන් පිටව ගිය බවත්, එහි ප්රතිඵලයක් ලෙස ගණපූරණය නොමැති වූ බව පෙත්සම්කරුවෝ පවසනවා.
සීතාවක ප්රාදේශීය සභාව සඳහා නව සභාපතිවරයෙකු පත් කර ගැනීම සඳහා වූ ඡන්ද විමසීම 17 වැනි දින කොමසාරිස්වරියගේ ප්රධානත්වයෙන් ආරම්භ වුණා.
එහිදී සභාපතිවරයා තෝරා පත්කර ගැනීම සඳහා රහස් ඡන්දයක් පවත්වන්නේ ද විවෘත ඡන්දයක් පවත්වන්නේ ද යන්න සිදුකළ විමසීමේ දි එක් පාර්ශ්වයක් විවෘත ඡන්දයක් පවත්වන ලෙසත් තවත් පාර්ශ්වයක් රහස් ඡන්දයක් පවත්වන ලෙසත් වූ යෝජනා ස්ථීර කර තිබුණා.
ඒ අනුව යෝජනා දෙකක් ඉදිරිපත් වී ඇති බැවින් සභාපතිවරයා පත් කර ගැනීම සඳහා වූ ඡන්ද විමසීම රහස් ඡන්දයක් ද විවෘත ඡන්දයක්ද වශයෙන් තීරණය කිරීමේ බලය කොමසාරිස්වරියට ඇති බැවින් මෙය රහස් ඡන්දයක් ලෙස පවත්වන බවට කොමසාරිස්වරිය පවසා සිටියා.
එම තීරණයට විරෝධය පළ කරමින් සභිකයින් 24 දෙනෙකු සභා ගර්භයෙන් පිටත්ව යාම හේතුවෙන් සභාවේ ඝන පූර්ණය නොමැති වීම මත සභාව විනාඩි 30කට කල් තැබීමට කොමසාරිස්වරිය කටයුතු කළා.
කෙසේ වෙතත් පසුව ඇති වූ තත්ත්වය මත සීතාවක ප්රාදේශීය සභාව දින නියමයක් නොමැතිව කල් තැබීමට කොමසාරිස්වරිය කටයුතු කළා.
ඒ අනුව සීතාවක ප්රාදේශීය සභාව සඳහා සභාපතිවරයෙකු සහ උප සභාපතිවරයෙකු පත් කර ගැනීම සිදුනොවුණු අතර එම කටයුත්ත දින නියමයක් නොමැතිව කල් තැබීමට ද සිදු වුණා.
එහෙත් එම තීරණයට විරෝධය පළ කරමින් මන්ත්රීවරුන් 24 දෙනෙකු සභා ශාලාවෙන් පිටව ගිය අතර, එහි ප්රතිඵලයක් ලෙස ඝන පූරණයක් නොමැති වූ බැවින් සභාව කල් තබීමට සිදු වූ බව පෙත්සම්කරුවෝ ප්රකාශ කර සිටියා.
එබැවින් බස්නාහිර පළාත් පාලන කොමසාරිස් සාරංගිකා ජයසුන්දර ඇතුළු වගඋත්තරකරුවන් සීතාවක ප්රාදේශීය සභාවේ සභාපති සහ උපසභාපතිවරයා තෝරා ගැනීම සඳහා රහස් ඡන්දයක් පැවැත්වීම වළක්වාලමින් අතුරු නියෝගයක් නිකුත් කරන ලෙස පෙත්සම්කරුවෝ ඉල්ලා සිටිනවා.
wpDiscuz
