මහ බැංකුව පොළී අනුපාත පහත දැමීමට අනුව යමින් පොළී අනුපාත පහත නොදමන වාණිජ බැංකු සහ මූල්‍ය ආයතන පිළිබඳ සොයා බලන බවත් ඒවා දැඩි නියමනයකට ලක් කිරීමට සූදානම් බවත් මුදල් රාජ්‍ය අමාත්‍ය රංජිත් සියඹලාපිටිය පවසනවා.
අමාත්‍යවරයා පෙන්වා දෙන්නේ මහ බංකුව අනුව යමින් පොළී අනුපාත පහළ දැමීමට වාණිජ බැංකු කටයුතු කළ යුතු බවයි.
සුරාබදු සැරයන්වරුන්ට ස්වර්ණ සම්මාන පිරිනැමීම වෙනුවෙන් සුරාබදු මූලස්ථානයේ ඊයේ (07) පැවැති උත්සවයට එක් වෙමින් ඔහු මේ බව සඳහන් කළා.
මේ අතර රාජ්‍ය ආදායම් ඉහළ නැංවා ගැනීම පිළිබඳ වාර්තාව ලබන 12 වැනිදා ජනාධිපති රනිල් වික්‍රමසිංහ වෙත භාර දෙන බව අමාත්‍යවරයා එහි දී සඳහන් කළා.
රජයට ආදායම් උපයා දෙන ආයතන සමග පැවැති දීර්ඝ සාකච්ඡාවලින් අනතුරුව මෙම වාර්තාව සකස් කරන බවයි ඔහු පැවසුවේ.
තව දුරටත් ජනතාව වෙත කිසිදු නව බදු බරක් ඇති නොකරමින් ආදායම් කළමනාකරණය කිරීම පිළිබඳ යෝජනා ගණනාවක් ඊට ඇතුළත් බව අමාත්‍යවරයා සඳහන් කර සිටියා.
බදු ජාලයේ පවතින සිදුරු වසමින් එය පුළුල් කිරීම පිළිබඳ යෝජනා, ආදායම් උපයා දෙන ආයතනවල සේවක ගැටලු ඇතුළු කරුණු රැසක් ද ඊට ඇතුළත්.
මධ්‍යසාර මිල ඉහළ යාම හේතුවෙන් ජනතාව නීති විරෝධී මධ්‍යසාර වෙත ඇදීයාම පිළිබඳව අදහස් දක්වමින් අමාත්‍යවරයා කියා සිටියේ ආදායම් වැඩිකර ගැනීම සඳහා මිල ඉහළ දැමීම වෙනුවට වෙනත් විකල්ප පිළිබඳ අවධානය යොමුව ඇති බවයි.
ඉදිරියේ දී ජනතාව මත කිසිදු නව බද්දක් පැනවීමට රජය අදහස් නොකරන බවත්, රජයේ අපේක්ෂාව හැකි සෑම අවස්ථාවකදීම ජනතාව බදු බරෙන් නිදහස් කිරීම බව රාජ්‍ය අමාත්‍යවරයා පෙන්වා දුන්නා.
බදු දැලෙන් පලා යන පුද්ගලයන් ඊට හසුකර ගැනීම සඳහා හැකි සෑම පියවරක්ම ගනිමින් බදු ජාලයේ සිදුරු 75%ක් වසා දැමීම සිය අපේක්ෂාව බව ද අමාත්‍යවරයා වැඩිදුරටත් පැවසුවා.
