මහ බැංකුව විසින් බැංකු පොළී අනුපාතික අඩු කරමින් පසුගියදා නිකුත් කළ චක්රලේඛයට අනුව තවමත් බැංකු පොළී අනුපාත අඩු නොකළ වාණිජ්ය බැංකු හා මූල්ය ආයතන කෙරෙහි මහ බංකුවේ දැඩි අවධානය යොමු කරවීමට කටයුතු කරන බව මුදල් රාජ්ය අමාත්ය රංජිත් සියඹලාපිටිය පවසනවා.
අවිස්සාවේල්ල ප්රදේශයේ ඊයේ (23) පැවති වැඩසටහනකින් අනතුරුව මාධ්ය වෙත අදහස් දක්වමින් රාජ්ය අමාත්යවරයා මේ බව සඳහන් කළා.
එහිදී අමාත්යවරයා පැවසුවේ පසුගිය වකවානුවේ බැංකු පොළී අනුපාතික ඉහළ මට්ටමක පැවති වකවානුවේ ලබාගත්, දීර්ඝ කාලීන තැන්පතු සඳහා පොළී ගෙවීමේ දී වාණිජ්ය බැංකුවලට ද යම් ගැටළු සහගත තත්ත්වයකට මුහුණදීමට සිදුව ඇති බවයි.
එහෙත් මහ බැංකුව විසින් නිකුත් කළ බැංකු පොළී අනුපාතිකවලට අනුව වාණිජ්ය බැංකු කටයුතු කරනු ඇතැයි දැඩි පීඩාවට පත්ව සිටින ජනතාව අපේක්ෂා කරන බව ඔහු මෙහිදී වැඩිදුරටත් අදහස් දක්වමින් පැවසුවා.
කෙසේ වෙතත් මහ බැංකුව මෙම බැංකු පොළී අනුපාතික අඩු කරනු ලැබුවේ ජනතාව පත්ව සිටින දැඩි පීඩාකාරී තත්ත්වය පිළිබදව සලකා බලා බැවින් , සියළුම රාජ්ය හා පෞද්ගලික වාණිජ්ය බැංකු මෙන්ම මූල්ය ආයතන ආදිය ද එම චක්රලේඛයට අනුගතව කටයුතු කළ යුතුයි යන්න රජයේ ස්ථාවරය බව ඔහු කියා සිටියා.
එබැවින් ක්ෂණිකවම එම බැංකු පොළී අනුපාත අඩුකිරීමට දැඩි හා සෘජු සොයා බැලීමක් කිරීමට කටයුතු කරන බව ද අමාත්යවරයා එහිදී සඳහන් කළා.
