සැමියා විසින් තම බිරිඳට එල්ල කළ ඇසිඩ් ප‍්‍රහාරයක් හේතුවෙන් බරපතළ පිළිස්සුම් තුවාල ලබා එම කාන්තාව ගාල්ල කරාපිටිය ශික්ෂණ රෝහලට ඇතුළත් කළ බව උඩුගම පොලිස් ස්ථානාධිපතිවරයා පැවසුවා.
පොලිසියට ලද පැමිණිල්ලකට අනුව මෙකී අඹු සැමි යුවළ අතර වූ පවුල් ආරවුලක් විභාග කිරීම සඳහා පොලිසියට පැමිණෙන ලෙස මොවුන් දෙදෙනාට පොලිසිය මගින් දැනුම් දී තිබූ අතර මොවුන් දෙදෙනා ස්ථාන දෙකක සිට අලූයම 5.30ට පමණ පොලිසියට පැමිණ තිබෙනවා.
කෙසේ වුවද පොලිස් ස්ථානයට ඇතුල්වන අවස්ථාවේ සැමියා විසින් ඇසිඩ් බෝතලයක් සඟවාගෙන විත් බිරිඳගේ මුහුණට ඇසිඩ් ගැසූ බවයි පොලිසිය පවසන්නේ. ඇසිඩ් ප‍්‍රහාරයෙන් බරපතළ පිළිස්සුම් තුවාල ලැබූ මෙකී කාන්තාව පොලිස් නිලධාරීන්ගේ මැදිහත්වීමෙන් රෝහල් ගත කිරීමට පියවරගෙන තිබෙනවා. සැකකාර සැමියා පොලිසිය මගින් අත්අඩංගුවට ගෙන ඇති අතර සැකකරුගේ හා පොලිස් නිලධාරියකුගේ දෑත්වලටද අසිඩ් වැදීමෙන් සුළු පිළිස්සුම් තුවාල සිදුවූ බවයි උඩුගම පොලිස් ස්ථානාධිපතිවරයා පැවසුවේ.
ඇසිඩ් ප‍්‍රහාරයට ලක්වූ කාන්තාව 28 හැවිරිදි වියේ පසුවන අතර සැකකරු 32 හැවිරිදි වියේ පසුවන උඩුගම අලුත්වත්ත ප‍්‍රදේශයේ පදිංචිකරුවන් වනවා. මොවුන් දෙදෙනාට දරුවන් තිදෙනෙකු සිටින අතර පවුල් ආරවුලක් නිසා කාන්තාව විසින් සැමියාගේ නිවසින් පිටව ගොස් ඇති බවයි විමර්ශන වලදී අනාවරණය වී ඇත්තේ.
