ශ්‍රී ලංකා පොදුජන පෙරමුණ සිය නව නිලධාරී මණ්ඩලය අද පත්කළ බව හම්බන්තොට දිස්ත්‍රික් පාර්ලිමේන්තු මන්ත්‍රී නාමල් රාජපක්ෂ පවසනවා.
නමුත් බැසිල් රාජපක්ෂ විසින් දරන ලද ජාතික සංවිධායක ධුරය පුරප්පාඩුව තබා ඇති බවයි මාධ්‍යවේදීන් කළ විමසීමකදී නාමල් රාජපක්ෂ සඳහන් කළේ.
පක්ෂ නායක මහින්ද රාජපක්ෂගේ නිල නිවසේදී රැස්වූ පක්ෂයේ විධායක සභාව මෙම තීරණවලට එළඹ තිබෙනවා.
ශ්‍රී ලංකා පොදුජන පෙරමුණේ ජාතික සංවිධායක ධුරය තරුණයෙකුට ලබාදෙන ලෙස බැසිල් රාජපක්ෂ පැවසූ බව අමාත්‍ය ප්‍රසන්න රණතුංග ප්‍රකාශ කළා.
ඒ, නෙළුම් මාවත පක්ෂ කාර්යාලයේ අද පැවති එහි විධායක සභා රැස්වීමෙන් අනතුරුව මාධ්‍ය වෙත අදහස් දක්වමින්.
පාර්ලිමේන්තු මන්ත්‍රී සාගර කාරියවසම් යළිත් වරක් මහලේකම් ලෙස පත්කර ඇති අතර පක්ෂයේ නව භාණ්ඩාගාරික ලෙස පත් කර ඇත්තේ පවිත්‍රා වන්නිආරච්චි යි.
පක්ෂයේ සභාපතිවරයා ලෙස උතුරාවල ධම්මරතන හිමි යළි පත්කිරීමටද පියවර ගෙන තිබෙනවා.
ශ්‍රී ලංකා පොදුජන පෙරමුණ සිය දේශපාලන මණ්ඩලයට ද සාමාජිකයන් පත්කර ඇති අතර, එහිදී නියෝජ්‍ය ජාතික සංවිධායක තනතුරු ද මෙවර නිර්මාණය වී ඇතැයි සඳහන්.
මෙම තනතුරු සඳහා දෙමළ සහ මුස්ලිම් ජාතිකයන් පසුව තෝරාගැනීමටයි පක්ෂය අපේක්ෂාවෙන් පසුවන්නේ.
wpDiscuz
