පීලි පැනපු රට පීල්ලට දැම්මේ මම – ජනපති

පීලි පැන ඇඳ වැටී තිබූ ශ්‍රී ලංකා ආර්ථිකය පසුගිය වසරක කාලය තුළ යළිත් පීල්ල මත තබන්නට හැකි වූ බව ජනාධිපති රනිල් වික්‍රමසිංහ පවසනවා.

ජනාධිපතිවරයා මේ බව සඳහන් කළේ, මේ වනවිට පාර්ලිමේන්තුවේ දී පැවැත්වෙන 2024 අයවැය ඉදිරිපත් කිරීමේ අවස්ථාවට එක්වෙමින්.

එලෙස අසීරුවෙන් පීල්ලට දැමූ රට ගොඩගැනීමට ජනතාව වෙහෙසෙන විට එසේ නොකර; රට ආපස්සට ඇද දමන්නට වෙහෙසුණු පිරිසකුත් සිටි බවයි ජනාධිපතිවරයා ප්‍රකාශ කළේ.

සුරංගනා කතා කියා රටක් ඉදිරියට ගෙන යා නොහැකි බවත්; කාලයක් තිස්සේ දේශපාලන පක්ෂ ලබා දුන් ඡන්ද පොරොන්දුවල අවසන් ප්‍රතිඵලය රට බංකොළොත් වීම බව පෙන්වා දුන් ජනාධිපතිවරයා අවාසනාවකට රටේ ඇතැම් කණ්ඩායම් තවමත් මෙම තත්ත්වය අවබෝධ කරගෙන නොමැති බව ද කියා සිටියා.

දේශපාලන අරමුණු වෙනුවෙන් මිත්‍යාව පැතිරීම නවත්වන ලෙසයි රනිල් වික්‍රමසිංහ ජනාධිපතිවරයා අයවැය ඉදිරිපත් කරමින් ඉල්ලා සිටින්නේ.

දේශපාලනයට වඩා රට ගැන සිතා රට ඉහළට ම ඔසවා තබන්නට සියලු දෙනා අවංක ව කැපවන ලෙස ද පාර්ලිමේන්තුවේ දී හෙතෙම ඉල්ලා සිටියා.

මෙම දුෂ්කර මාවතේ ඉදිරියට ගියහොත් නොබෝ කලකින් මීට වඩා යහපත් ආර්ථික පරිසරයක් නිර්මාණය කර ගත හැකි බව සඳහන් කළ ජනාධිපතිවරයා පසුගිය වසර දෙස හැරී බලන විට රට යන මාවත නිවැරදි බව 100%ක් ම සනාථ වන බව ද ප්‍රකාශ කළා.

මෙතෙක් පැමිණි ගමන් මගෙහි සිදු වූ අඩුපාඩු හඳුනා ගනිමින් ඒවා නිවැරදි කර ගැනීමට නිහතමානී ව කටයුතු කරන බව 2024 අයවැය ඉදිරිපත් කරමින් ජනාධිපති රනිල් වික්‍රමසිංහ වැඩිදුරටත් කියා සිටියා.