රුපියල් ලක්ෂ 14කට අධික වටිනාකමකින් යුතු කිරි හරක් ගවයින් පස්දෙනකු සොරකම් කිරීම සම්බන්ධයෙන් ලද පැමිණිලි දෙකක් , සටහන් පොත්වල සටහන් නොකර නිසි විමර්ශනයක් සිදු නොකළ බව කියන සිද්ධියක් සම්බන්ධයෙන් නාරම්මල පොලිස් ස්ථානයේ වැඩබලන පොලිස් ස්ථානාධිපතිවරයා සහ අපරාධ විමර්ශන අංශයේ ස්ථානාධිපතිවරයාගේ වැඩ තහනම් කර ඇතැයි පොලිස් මූලස්ථානය පවසනවා.
අප ප්‍රාදේශීය වාර්තාකරු පැවසුවේ, මෙලෙස වැඩ තහනමට ලක්ව ඇත්තේ වැඩබලන පොලිස් ස්ථානාධිපතිවරයා වශයෙන් කටයුතු කළ පොලිස් පරීක්ෂකවරයකුගේ සහ අපරාධ විමර්ශන අංශයේ ස්ථානාධිපතිවරයා වශයෙන් කටයුතු කළ උප පොලිස් පරීක්ෂකවරයකුගේ බවයි.
රුපියල් ලක්ෂ 12ක් වටිනා එළ ගවයින් සිව් දෙනකු සහ සහ රුපියල් ලක්ෂ දෙකක් පමණ වටිනා ගවයකු සොරකම් කිරීම සම්බන්ධයෙන් පුද්ගලයන් දෙදෙනෙකු ඉකුත් 07 වැනිදා නාරම්මල පොලිස් ස්ථානය වෙත පැමිණ අදාළ පැමිණිල්ල සිදු කර තිබෙනවා.
පැමිණිලිකරුවන් දෙදෙනා වැඩබලන පොලිස් ස්ථානාධිපති වන පොලිස් පරීක්ෂකවරයාට සහ අපරාධ විමර්ශන අංශයේ ස්ථානාධිපතිවරයා වශයෙන් කටයුතු කරන උප පොලිස් පරීක්ෂකවරයා වෙත පැමිණිලි කර ඇති බව උසස් පොලිස් නිලධාරියෙක් සඳහන් කළා.
මේ සම්බන්ධයෙන් කුලියාපිටිය ජ්‍යෙෂ්ඨ පොලිස් අධිකාරිවරයා වෙත ලද තොරතුරකට අනුව විමර්ශනය කර පසුගිය 08 වැනිදා මෙම වැඩ තහනම සිදුකළ බව ද එම උසස් පොලිස් නිලධාරියා සඳහන් කළා.
නාරම්මල පොලිසිය සිද්ධිය සම්බන්ධයෙන් පරීක්ෂණ පවත්වනවා.
