ගම්පොළ – මහනුවර මාර්ගයේ ගුරුදෙණිය ප්‍රදේශයේ සිදු වූ රිය අනතුරකින් පුද්ගලයෙකු මියගොස් තිබෙනවා.
අද (22) පෙරවරුවේ මෙම අනතුරට මුහුණ පා ඇත්තේ මෝටර් රථයක් සහ යතුරුපැදියක් එකිනෙක ගැටීමෙන් බවයි වාර්තා වන්නේ.
මරණකරු විදුලි කාර්මික, වඩුවැඩ ආදි විවිධ වෘත්තීන්වල නියැලෙමින් කටයුතු කරන්නෙකු වන බවත් හෙතෙම අද උදෑසන ගමේ විහාරස්ථානය වෙත දානය ද පූජා කර යළිත් රාජකාරි සඳහා ගෙලිඔය ප්‍රදේශයට ගමන් කරමින් සිටියදී මෙම අනතුරට මුහුණ පා තිබෙනවා.
අනතුරින් මියගොස් ඇත්තේ ගිරාඋල්ල ප්‍රදේශයේ පදිංචි මධුර කීර්ති නමැති 58 හැවිරිදි දෙදරු පියෙක්.
කොළඹ – දෙල්ගොඩ ප්‍රදේශයේ සිට ගම්පොළ දෙසට පැමිණ ඇති මෙම මෝටර් රථය මාර්ගයේ වැරදි දෙසට ධාවනය වී මෙම පැදිකරු ද යට කරගෙන ගොස් මාර්ගයේ පැති බැම්මේ ගැටී නතර වී තිබෙනවා.
අනතුරට හේතුව රියදුරුට නින්ද යාම බවයි පොලිසිය සැක කරන්නේ.
සිද්ධිය සම්බන්ධයෙන් දවුලගල පොලිසිය පරීක්ෂණ සිදු කරනවා.
