විදෙස් ගමන් බලපත්‍රයක් සකස් කර දීම සඳහා යැයි පවසමින් අල්ලස් වශයෙන් රුපයිල් 20,000ක මුදලක් ඉල්ලා ලබාගත්තැයි කියන එම දෙපාර්තමේන්තුවේ කාර්යාල කාර්ය සහායකවරියක සහ තැරැව්කරුවන් තුන් දෙනෙකු ලබන 28 දක්වා රක්ෂිත බන්ධනාගාර ගත කර තිබෙනවා.
කොළඹ ප්‍රධාන මහේස්ත්‍රාත් ප්‍රසන්න අල්විස් මහතායි අද (16) මෙම නියෝගය ලබාදුන්නේ.
ආගමන විගමන දෙපාර්තමේන්තු කාර්යාලය මගින් මාර්ග ගත ක්‍රමය ඔස්සේ කලින් දිනයක් වෙන්කර නොගෙන එක්දින සේවාව යටතේ විදෙස් ගමන් බලපත්‍රයක් සකස් කර දීම සඳහා සැකකරුවන් මෙලෙස මුදල් ලබාගෙන තිබෙනවා.
රක්ෂිත බන්ධනාගාර ගත කරනු ලැබුවේ ආගමන විගමන දෙපාර්තමේන්තුවේ කාර්යාල කාර්ය සහායිකාවක්, ගොඩනැගිලි දෙපාර්තමේන්තුවේ කාර්යාල කාර්ය සහායකයෙක්, ලොතරැයි අලෙවිකරුවෙක් මෙන්ම දුරකතන සිම්කාඩ්පත් අලෙවිකරුවකු සහ තවත් අයෙක්.
මෙම සිද්ධිය සම්බන්ධයෙන් අල්ලස් කොමිසම වෙත පැමිණිල්ලක් ඉදිරිපත් කරනු ලැබ තිබුණේ කොළඹ 07, මලලසේකර මාවත ප්‍රදේශයේ පදිංචිකරුවෙක්.
ඉදිරිපත් වූ කරුණු සැලකිල්ලට ගත් අධිකරණය සැකකරුවන් ලබන 28 වැනිදා තෙක් රක්ෂිත බන්ධනාගාර ගත කර එදින තෙක් නඩුව කල් තබනු ලැබුවා.
