පසුගියදා අරාබි මුහුදු තීරයේ දී ඇල්ලූ නීතිවිරෝධී මත්ද්‍රව්‍ය තොගය ඉන්දීය නාවික හමුදාව විසින් ශ්‍රී ලංකා නාවික හමුදා භාරයට පත් කර තිබෙනවා.
එලෙස ඉන්දීය නාවික හමුදා භාරයට ගැනුණු මත්ද්‍රව්‍ය ප්‍රවාහනය කළ ඩිංගි යාත්‍රා දෙකක් සහ ශ්‍රී ලාංකික සම්භවයක් සහිත සැකකරුවන් සයදෙනෙකු අද (02) පෙරවරුවේ මෙරට නාවික හමුදා ගජබාහු නෞකාව වෙත භාර දී ඇති බවයි වාර්තා වන්නේ.
නාවික හමුදාපති වයිස් අද්මිරාල් ප්‍රියන්ත පෙරේරා මහතා අද පෙරවරුවේ කොළඹ වරාය වෙත පැමිණියේ ඉන්දීය නාවික හමුදාව විසින් ලුහුබැඳ සිය අත් අඩංගුවට ගත් සැකකරුවන් සමග අයිස් මත්ද්‍රව්‍ය තොගය භාරගැනීමට පැමිණීම සඳහා යි.
එහිදී මාධ්‍ය හමුවක් පවත්වමින් නාවික හමුදාපතිවරයා පැවසුවේ; තම නාවික හමුදාවට ඇතුල් විය නොහැකි ඉන්දීය කලාපයට අයත් මුහුදු තීරයේ දී බුද්ධි අංශ කළ දැනුවත් කිරීම් අනුව ඉතිහාසයේ පළමු වරට ඉන්දීය නාවික හමුදාවේ සහාය ලබාගෙන මෙම මෙහෙයුම සාර්ථක කරගැනීමට කටයුතු කළ බවයි.
එබැවින් ඉන්දීය නාවික හමුදාවට ශ්‍රී ලංකා රජය වෙනුවෙන් මෙරට නාවික හමුදාපතිවරයා සිය ස්තුතිය ද පුදකර සිටියා.
මෙම අයිස් මත්ද්‍රව්‍ය තොගයෙහි කිලෝග්‍රෑම් 400ක් පමණ ඇතැයි විශ්වාස කෙරෙන බවත් තවමත් එහි කිරුම් කටයුතු සිදුවන බව ද ශ්‍රී ලංකා නාවික හමුදාපති පැවසුවා.
අත්අඩංගුවට ගත් සැකකරුවන් 11 දෙනා සම්බන්ධයෙන් ඉදිරි නීතිමය කටයුතු ක්‍රියාත්මක කිරීමට නියමිතයි.
එමෙන්ම පසුගියදා මෙරට නාවික හමුදා බුද්ධි අංශ විසින් මාලදිවයින රාජ්‍යයට ලබා දුන් තොරතුරු මත එම මුහුදු තීරයේ දී අයිස් මත්ද්‍රව්‍ය කිලෝග්‍රෑම් 344ක් සහ කොකේන් කිලෝග්‍රෑම් 144ක් ද සොයාගැනීමට හැකි වූ බවත් නාවික හමුදාපති ප්‍රකාශ කළා.
අන්තර්ජාතික නාවික කටයුතු මිත්‍ර සබඳතා හේතුවෙන් තවදුරටත් ශක්තිමත් කරගනිමින් මෙවැනි මෙහෙයුම් ඉදිරියටත් සිදු කිරීමට බලාපොරොත්තු වන බවයි ශ්‍රී ලංකා නාවික හමුදාපති වයිස් අද්මිරාල් ප්‍රියන්ත පෙරේරා මහතා පැවසුවේ.
ශ්‍රී ලංකා වෙරළාරක්ෂක බලකාය, පොලිස් මත්ද්‍රව්‍ය නාශක කාර්‍යාංශය, බුද්ධි අංශ ද මෙම මෙහෙයුම සඳහා සිය උපරිම දායකත්වය ලබා දුන් බව ද ප්‍රියන්ත පෙරේරා මහතා වැඩිදුරටත් පැවසුවා.
