නුවරඑළිය ප්‍රදේශයේ අද (11) අලුයම මාරක රිය අනතුරක් සිදු ව තිබෙනවා.
තොරතුරු වාර්තා වන පරිදි මෙම අනතුරින් පුද්ගලයින් 25 දෙනෙකු තුවාල ලබා රෝහල්ගත කර ඇති බවයි වාර්තා වන්නේ.
මෙලෙස අනතුරට ලක් ව ඇත්තේ බස් රථයක්.
අධික වේගයෙන් ධාවනය වෙමින් තිබූ මෙම බස් රථය නුවරඑළිය – ටොප්පාස් ප්‍රදේශයේ දී මාර්ගයෙන් ඉවතට පෙරළී ගොස් තිබෙනවා.
මෙලෙස අනතුරට ලක් ව ඇත්තේ නුවරඑළිය ග්‍රෑන්ඩ් හෝටලයේ වාර්ෂික විනෝද චාරිකාව සඳහා සහභාගී වූ සේවක සේවිකාවන් රැගත් බස් රථයක් බවයි අප ප්‍රාදේශීය වාර්තාකරු පැවසුවේ.
එම අනතුරින් බස් රථයේ ගමන් කළ පිරිසෙන් 40 දෙනෙකු මේ වනවිට රෝහල්ගත කර තිබෙනවා.
බස් රථය මාර්ගය හරහා පෙරළී ගොස් ඇති අතර; තුවාල ලැබූවන්ගෙන් 07 දෙනෙකුට බරපතළ බවයි වාර්තාවන්නේ.
මෙම වාර්ෂික විනෝද චාරිකාව සඳහා අද අලුයම නුවරඑළිය නගර මධ්‍යයේ පිහිටි ග්‍රෑන්ඩ් හෝටල් පරිශ්‍රයේ සිට ගමන් ආරම්භ කර ඇති අදාළ බස් රථය කිලෝමීටර දෙකක පමණ දුරක් ගමන් කරන විට ටොප්පාස් ප්‍රදේශයේ දී අනතුරට මුහුණ පා තිබෙනවා.
නුවරඑළිය දිස්ත්‍රික් මහා රෝහල සඳහන් කළේ තුවාලකරුවන් අතරින් පිරිමි 35 දෙනෙකු සහ ගැහැනු 05 දෙනෙකු සිටින බවයි.
ප්‍රදේශවාසීන්ගේ පොලිසියේ නිලධාරීන්ගේ සහයෝගයෙන් 1990 ගිලන් රථ සේවාවේ හා නුවරඑළිය දිස්ත්‍රික් මහ රෝහලේ ගිලන් රථ උපයෝගී කරගනිමින් තුවාල ලැබූ පිරිස නුවරඑළිය දිස්ත්‍රික් මහ රෝහලට ඇතුළත් කිරීමටත් පියවර ගැනුණා.
තුවාල ලැබුවන්ගේ සෞඛ්‍ය තත්ත්වය පිළිබඳ නුවරඑළිය දිස්ත්‍රික් මහ රෝහලේ අධ්‍යක්ෂක මහේන්ද්‍ර සෙනවිරත්න මහතාගෙන් අප කළ විමසීමක් අනුව ඒ මහතා කියා සිටියේ 40 දෙනෙකු තුවාල ලබා රෝහල්ගත කර ඇති අතර ඉන් හත් දෙනෙකුගේ තත්ත්වය තරමක් බරපතළ වන බවයි.
කෙසේ නමුත් ජීවිත අවදානම් තත්ත්වයක් මෙතෙක් වාර්තා නොවූ බවත් බරපතළ තත්ත්වයෙන් හදිසි රෝග අංශයේ ප්‍රතිකාර ලබන රෝගීන් පිළිබඳ විශේෂ අවධානයක් යොමු කරන බව ද ඔහු වැඩිදුරටත් සඳහන් කළා.
සිද්ධිය සම්බන්ධයෙන් පොලිස් විමර්ශන ක්‍රියාත්මකයි.
