සිලාවතුර ප්‍රදේශයට ඔබ්බෙන් වූ මුහුදු ප්‍රදේශයේ සිදු කළ විශේෂ සෝදිසි මෙහෙයුමක් මඟින් රාත්‍රී කිමිදුම් කටයුතු සිදුකළ පුද්ගලයින් 7 දෙනෙකු සමඟ ඩිංගි යාත්‍රා 2ක් නාවික හමුදා භාරයට ගෙන තිබෙනවා.
අද (13) අළුයම වයඹ නාවික විධානය මඟින් සිලාවතුර ප්‍රදේශයට ඔබ්බෙන් වූ මුහුදු ප්‍රදේශයේ සිදු කරන ලද විශේෂ සෝදිසි මෙහෙයුමක් මඟිනුයි මෙම අත්අඩංගුවට ගැනීම සිදු කර ඇත්තේ.
මෙම මෙහෙයුමේදී නාවික හමුදාව සැක කටයුතු ඩිංගි යාත්‍රා දෙකක් පරීක්ෂාවට ලක් කර ඇති අතර එහිදී, නීති විරෝධී ලෙස රාත්‍රී කිමිදුම් කටයුතු සිදුකළ පුද්ගලයින් 07 දෙනා සමඟ මුහුදු කූඩැල්ලන් 874ක්, කිමිදුම් උපකරණ සහ එම ඩිංගි යාත්‍රා දෙක නාවික හමුදා භාරයට ගෙන තිබෙනවා.
එම පුද්ගලයන් වයස අවුරුදු 22 ත් 48 ත් අතර වයසේ පසුවන මන්නාරම ප්‍රදේශයෙහි පදිංචිකරුවන් බවටයි හඳුනාගෙන ඇත්තේ.
සැකකරුවන්, ඩිංගි යාත්‍රා, මුහුදු කූඩැල්ලන් සහ කිමිදුම් උපකරණ ඉදිරි නීතිමය කටයුතු සඳහා සිලාවතුර ධීවර පරීක්‍ෂක කාර්යාලය වෙත භාර දීමට නියමිතයි.
