නියෝජ්‍ය ඇමති නලීන් හේවගේ කියූ පචයක් ගැන කැබිනට්ටුවේ දී එළියට ආ හැටි

නියෝජ්‍ය අමාත්‍ය නලීන් හේවගේ විසින් පසුගිය දිනක ජාතික ජන බලවේගය රජය බලයට පත්වන විට භාණ්ඩාගාරය සතුව ඩොලර් මිලියන 20 ක් පමණක් තිබූ බවත්, එතැන් සිට නව රජය සංචිත ඩොලර් බිලියන 6.19 දක්වා වැඩි කළ බවත් පවසා සිටියා.

ඔහු මේ බව පවසා සිටියේ, පළාත් පාළන මැතිවරණයට පෙර ගාල්ලේ පැවති මහජන රැලියක් අමතමින්.

කෙසේවෙතත් ඊට ප්‍රතිචාර දක්වමින්, කැබිනට් ප්‍රකාශක අමාත්‍ය නලින්ද ජයතිස්ස විසින් සතිපතා කැබිනට් මාධ්‍ය හමුවේ දී (අප්‍රේල් 07) ප්‍රකාශ කළේ 2024 සැප්තැම්බර් සිට 2025 මාර්තු දක්වා මහ බැංකුව විසින් සත්‍යාපනය කරන ලද නිල සංඛ්‍යාලේඛන හෙළි කරන බවයි.

ඒ අනුව එලෙස හෙළිදරව් කළ සංඛ්‍යාලේඛන පහත දැක්වේ.

•⁠ 2024 සැප්තැම්බර්: ඩොලර් බිලියන 5.99
•⁠ 2024 ඔක්තෝබර්: ඩොලර් බිලියන 6.47
•⁠ 2024 නොවැම්බර්: ඩොලර් බිලියන 6.45
•⁠ 2024 දෙසැම්බර්: ඩොලර් බිලියන 6.12
•⁠ 2025 ජනවාරි: ඩොලර් බිලියන 6.06
•⁠ 2025 පෙබරවාරි: ඩොලර් බිලියන 6.08
•⁠ 2025 මාර්තු: ඩොලර් බිලියන 6.51

කැබිනට් මාධ්‍ය ප්‍රකාශකවරයා පැවසුවේ කිසියම් දෝෂයක් සිදු වී ඇත්නම්, මහ බැංකුව විසින් නිකුත් කරන ලද මෙම නිල සංඛ්‍යාලේඛන පිළිගත යුතු බව ඉල්ලා සිටින බවයි.

මේ අනුව පෙනී යන්නේ මැතිවරණ කාල සීමාවේ දී මන්ත්‍රී නලීන් හේවගේ දැන හෝ නොදැන රටේ භාණ්ඩාගරය ගැන සිදු කර ඇත්තේ අසත්‍ය ප්‍රකාශයක් බවයි.