77 වන නිදහස් දින සැමරුම් උළෙලේ ආරක්ෂාව වෙනුවෙන් පොලිස් නිලධාරීන් 1,000කට අධික පිරිසක් යොදවා ඇති බව පොලිසිය පවසනවා.
අද (03) පෙරවරුවේ පැවති මාධ්‍ය හමුවකට එක්වෙමින් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග සඳහන් කළේ නිදහස් දින සැමරුම උළෙල නැරඹීම වෙනුවෙන් පැමිණෙන පුද්ගලයින් පරීක්ෂාවකින් අනතුරුව එම උත්සවය වෙත යොමු කරන බවයි.
මේ අතර උදෑසන 7.00ට පෙර අදාළ ස්ථානය වෙත ගොස් අසුන් ගන්නා ලෙසයි සියලු ආරාධිතයින්ගෙන් පොලිසිය ඉල්ලා සිටින්නේ.
එමෙන්ම නිදහස් දින සැමරුම් උළෙල පැවැත්වෙන කාල සීමාව තුළ විශේෂිත රථ වාහන සැලැස්මක් ක්‍රියාත්මක කිරීමට නියමිත බව ද පොලිසිය සඳහන් කළා.
මාර්ග ආරක්ෂාව දිසාව භාර නියෝජ්‍ය පොලිස්පති ඉන්දික හපුගොඩ සඳහන් කළේ නිදහස් දින සැමරුම නැරඹීමට පැමිණෙන මහජනතාව බෞද්ධාලෝක මාවතෙන් පැමිණිය යුතු අතර, ඔවුන් රූපවාහිනි පරිශ්‍රය ආසන්නයෙන් පරීක්ෂාවට ලක් කෙරෙන බවයි.
හෙට (04) දිනයේ දී බෞද්ධාලෝක මාවත, ටොරින්ටන් හන්දිය, ප්‍රේමකීර්ති ද අල්විස් මාවතට ඇතුළු වීම, ආර්.අස්.පී හන්දියෙන් රාජ්‍ය පරිපාලනය දෙසට ඇතුළු වීම, විජේරාම විද්‍යා මාවතෙන් විද්‍යා මාවත දෙසට ඇතුළු වීම, නිදහස් මාවත නිදහස් වටරවුමෙන් මෙට්ලන්ඩ් චන්ද්‍රවංකය දෙසට ඇතුළුවීම, ස්ටැන්ලි විජේසුන්දර මාවතෙන් පදනම් මාවත හන්දියෙන් නිදහස් මාවත දෙසට ඇතුළුවීම, නිදහස් වටරවුමින් නිදහස් චතුරස්‍රය දෙසට ඇතුළුවීම, පුස්තකාල වටරවුමෙන් හෝර්ටන් වටරවුම දෙසට ඇතුළුවීම සහ නිදහස් පදනම් හන්දියෙන් නිදහස් මාවතට ඇතුළු වීම මාර්ගය වසා ගමනා ගමනය සීමා කර ඇති බව පොලිසිය පවසනවා.
ඊට අමතරව කොළඹ නගරයට ඇතුළුවන වාහන සඳහා විකල්ප මාර්ග ලෙස; නන්දා මෝටර්ස් දෙස සිට පැමිණෙන වාහන නිදහස් වටරවුමෙන් දකුණට හැරී පිලිප් ගුණවර්ධන මාවත ඔස්සේ, ස්ටැන්ලි විජේසුන්දර මාවතෙන් බෞද්ධාලෝක මාවතට ඇතුළු වී තුම්මුල්ලට හා බොරැල්ල කනත්ත දෙසටත් ගමන් කිරීමට හැකියාව පවතිනවා.
එමෙන්ම බෞද්ධාලෝක මාවතෙන් හෝර්ටන් වටරවුම දක්වා පැමිණෙන වාහන විජේරාම මාවත ඔස්සේ ගමන් කර හෝර්ටන් දෙසට ගමන් කළ හැකියි.
එමෙන්ම විජේරාම හන්දියෙන් විද්‍යා විජේරාම හන්දියෙන් තුම්මුල්ල දෙසට ගමන් ගන්නා වාහන විද්‍යා විජේරාම හන්දියෙන් බුලස් විජේරාම දෙසට පැමිණ බොරැල්ල කනත්ත දෙසට හා තුම්මුල්ල දෙසට ගමන් කිරීමේ හැකියාව ද පවතිනවා.
