පසුගිය දා නානුඔය – රදැල්ල කෙටි මාර්ගයේ සිදු වූ මාරක රිය අනතුරින් ජීවිතක්ෂයට පත් වූ හත්දෙනාගෙන් තවත් පුද්ගලයෙකුගේ අවසන් කටයුතු අද (23) පස්වරුවේ සිදු කෙරුණා.
මෙලෙස අද අවසන් කටයුතු සිදුකෙරුනේ අනතුරට ලක් වූ වෑන් රථයේ රියදුරුගේ බවයි අප වාර්තාකරු සඳහන් කළේ.
28 හැවිරිදි ආර්.එන්.පි. දිනේෂ් නැමැති මෙම තරුණයාගේ අවසන් කටයුතු සිදු කෙරුනේ හැටන් – කුඩාගම පොදු සුසාන භුමියේදීයි.
පසුගිය 20 වනදා පස්වරුවේ අධ්යාපන චාරිකාවක් ගොස් යළි කොළඹ බලා පැමිණෙමින් සිටි කොළඹ තර්ස්ටන් විද්යාලයේ සිසුන් පිරිසක් රැගත් බස් රථයක් වෑන් රථයක ගැටී මෙම අනතුර සිදුව තිබුණා.
මෙම අනතුරට එම අවස්ථාවේ ඒ අසලින් ගමන්ගත් ත්රිරෝද රථයක් ද මැදිව තිබුණා.
අනතුරින් වෑන් රථයේ ගමන්ගත් එකම පවුලේ පස්දෙනෙක්, වෑන් රථයේ රියදුරු සහ අනතුරට මැදි වූ ත්රිරෝද රථයේ රියදුරු ජීවිතක්ෂයට පත් වුණා.
අනතුරින් ජීවිතක්ෂයට පත් වූ එකම පවුලේ පස්දෙනාගේ අවසන් කටයුතු ඊයේ (22) අලුයම සිදුකළ අතර, මියගිය ත්රිරෝද රථයේ රියදුරුගේ අවසන් කටයුතු ද ඊයේ (22) ඔහු ජීවත්ව සිටි නානුඔය ප්රදේශයේ දී සිදුකළ බවයි අප වාර්තාකරු සඳහන් කළේ.
