ශ්‍රී ලංකා නාවික හමුදාවට අභිනවයෙන් පත් වූ නාවික හමුදාපති වයිස් අද්මිරාල් කාංචන බානගොඩ ඊයේ (02) නියෝජ්‍ය ආරක්ෂක අමාත්‍ය මේජර් ජෙනරල් අරුණ ජයසේකර (විශ්‍රාමික) මහතා මුණගැසුණා.
ඒ ආරක්ෂක අමාත්‍යාංශයේ දීයි.
මෙරට පත් වූ 26 වන නාවික හමුදාපතිවරයා ලෙස වයිස් අද්මිරාල් බානගොඩ පත් වීමෙන් පසු නියෝජ්‍ය ආරක්ෂක අමාත්‍යවරයා සමඟ පවත්වන ලද පළමු නිල හමුව මෙය වනවා.
මෙම හමුවේ දී නියෝජ්‍ය ආරක්ෂක අමාත්‍යවරයා වයිස් අද්මිරාල් බානගොඩගේ පත්වීම පිළිබඳ ව සිය සුබපැතුම් පළ කළ අතර, ඔහුගේ නායකත්වය යටතේ නාවික හමුදාව සඳහා ප්‍රධාන ප්‍රමුඛතා කිහිපයක් පිළිබඳව ද අවධාරණය කළා.
මෙම ප්‍රමුඛතාවයන් පාලනයේ සහ වගවීමේ ඉහළම ප්‍රමිතීන්ට අනුගත වෙමින් මෙහෙයුම් විශිෂ්ටත්වය පවත්වා ගැනීම කෙරෙහි අවධානය මෙහිදී යොමු කෙරුණා.
සමුද්‍රීය ආරක්‍ෂාව සම්බන්ධයෙන් ශ්‍රී ලංකා නාවික හමුදාවට අත්‍යවශ්‍ය කාර්යභාරයක් ඉටු කිරීම සඳහා සහාය දැක්වීම සඳහා ආරක්ෂක අමාත්‍යාංශයේ දැඩි කැපවීම මෙම හමුවේ දී අවධාරණය කරන ලද අතර, යහපාලනය, රාජ්‍ය මූල්‍ය වගකීම සහ නාවික හමුදාවේ සේවය කරන ලද සහ වර්තමාන සාමාජිකයින්ගේ සුබසාධන කටයුතුවල වැදගත්කම ද අවධාරණය කෙරුණු බවයි පැවසෙන්නේ.
