නත්තල් දිනය වෙනුවෙන් ජනාධිපතිවරයා වෙත ආණ්ඩුක්‍රම ව්‍යවස්ථාවේ 34 වන වගන්තියෙන් පැවරී ඇති බලතල අනුව බන්ධනාගාරගත සිරකරුවන් හට විශේෂ රාජ්‍ය සමාවක් ලබාදීමට තීරණය කර තිබෙනවා.
මෙම සිරකරුවන්ට කොන්දේසි හා සීමාවන්ට යටත්ව මෙම පොදු සමාව ප්‍රදානය කර ඇති බවයි බන්ධනාගාර මාධ්‍ය ප්‍රකාශක බන්ධනාගාර කොමසාරිස් ගාමිණි බී. දිසානායක මහතා සඳහන් කළේ.
ඒ අනුව බන්ධනාගාර ගතව 25 වනදා වන විට ද සිර දඬුවම් විඳිමින් සිටින සිරකරුවන් හට ගතකරන ලද වසරකට හෝ ඉන් කොටසකට මාස 01 සමාවක් ලබා දී තිබෙනවා.
දඩ මුදල් නොගෙවීම මත 25 වනදා වන විට සිර දඬුවම් විදිමින් සිටින සිරකරුවන්ගේ ගෙවමින් පවතින දඬුවමේ ශේෂය ද අහෝසි කිරීමටයි තීරණය කර ඇත්තේ.
එමෙන්ම 25 වනදා වන විට විට නියමකර ඇති සිර දඬුවමින් හරි අඩක් හෝ ඊට වැඩි කාලයක් ගෙවා ඇති, වයස අවුරුදු 65ක් ඉක්මවා ඇති සිරකරුවන්ගේ සිරදඬුවමේ ඉදිරි ශේෂය ද අහෝසි කර තිබෙනවා.
වසර 40ක් හෝ ඊට වැඩි සිර දඬුවම් නියම කර ඇති, 25 වන දිනට, එම දඩුවමින් වසර 20ක කාලයක් ගෙවා අවසන් කර ඇති (මහාධිකරණයෙන් දඩුවම් නියම කල දිනයේ සිට) සිරකරුවන්ගේ දඩුවමේ ඉදිරි ශේෂය ද අහෝසි කර ඇති බව සඳහන්.
25 වනදා වන විට මත්ද්‍රව්‍ය චෝදනා සම්බන්ධයෙන් වරදකරුවන් කර ඒ සඳහා (දඩ මුදල් නොගෙවීම මත නියමකර ඇති සිර දඬුවම්ද ඇතුලත්ව) පුනරුත්ථාපනයට යොමු කර ඇති සිරකරුවන්ගේ නියමකර ඇති පුනරුත්ථාපන කාලයෙන් හරි අඩක් හෝ ඊට වැඩි කාලයක් ගෙවා අවසන් කර ඇති රැඳවියන්ගේ එම පුනරුත්ථාපන කාලයේ ඉදිරි ශේෂය 1999 අංක 46 දරණ පනත පරිදි ප්‍රජා විශෝධන නිලධාරීයෙකුගේ අධීක්ෂණය යටතේ ගත කිරීමට ද අවස්ථාව ලබාදී තිබෙනවා.
මෙම ජනාධිපති පොදු සමාව ප්‍රදානය කිරීම අනුව, සමාවට සුදුසුකම් ලබන සිරකරුවන් දිවයිනේ සෑම බන්ධනාගාරයකින්ම නිදහස් කිරීමට නියමිතයි.
