ධීවරයන් පිරිසක් විසින් සිදු කරන උද්ඝෝෂනයක් හේතුවෙන් විශාල මහජන පීඩාවක් සිදුවන බැවින් එය නැවැත්වීම සඳහා නියෝගයක් නිකුත් කරන ලෙසට කොටුව පොලීසිය මෝසමක් ගොනු කරමින් සිදු කළ ඉල්ලීම කොටුව මහේස්ත්රාත් ඉසුරු නෙත්තිකුමාරගේ මහතා අද (10) ප්රතික්ෂේප කළා.
ජනතාවට සාමකාමී උද්ඝෝෂණ සිදු කළ හැකි බවත් උද්ඝෝෂණය කිරීම ජනතාව වෙත ඇති අයිතියක් බව කියමින් මහේස්ත්රාත්වරයා එම ඉල්ලීම ප්රතික්ෂේප කරනු ලැබුවා.
එසේම උද්ඝෝෂකයන් විසින් මංමාවත් පනත, පොලිස් ආඥා පනත ඇතුළු නෛතික විධිවිධාන උල්ලංඝනය කරමින් මහජන පීඩාවක් ඇතිවන අයුරින් උද්ඝෝෂණය සිදු කරන්නේ නම් පොලිස් බලතල අනුව ක්රියාත්මක වන ලෙසද මහේස්ත්රාත්වරයා කොටුව පොලිසියට නියෝග කළා.
මෙම උද්ඝෝෂණය හේතුවෙන් විශාල මහජන පීඩාවක් සිදුවන බවත් දින ගණනාවක් තිස්සේ ඔවුන් උද්ඝෝෂණයක නියැලී සිටින බවත් කොටුව පොලිසිය වැඩිදුර වාර්තාවක් ඉදිරිපත් කරමින් කොටුව මහේස්ත්රාත් අධිකරණය හමුවේ කරුණු දක්වමින් මෙම ඉල්ලීම සිදු කරනු ලැබුවා.
ඔවුන් ඇරඹි සත්යග්රහය අඛණ්ඩව අද (10) හයවන දිනටත් ක්රියාත්මක කර ඇති බවත් පොලිසිය වැඩිදුරටත් අධිකරණය හමුවේ සදහන් කළා.
ට්රැක්ටර්වලට සවිකළ වින්ච් යන්ත්ර යොදාගනිමින් සිදුකරන මාදැල් ධීවර කර්මාන්තයට වත්මන් ආණ්ඩුව පනවා ඇති තහනම ඉවත් කරන ලෙස ඉල්ලා ඔවුන් එම උද්ඝෝෂණයෙන් නිරතව ඇති බවද පොලිසිය අධිකරණයට දැන්වූවා.
