ධනුෂ්ක ගුණතිලකට අධිකරණයෙන් සහනයක්

ස්ත්‍රී දූෂණ චෝදනාවක් හේතුවෙන් මාස 8කට වැඩි කාලයක් ඔස්ට්‍රේලියාවේ සිටින ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලකට තවත් සහනයක් හිමිවී තිබෙනවා.

ඒ අනුව ඔහුට විදෙස් ගමන් තහනම තවදුරටත් පවතින අතර ඇප කොන්දේසි ලිහිල් කිරීමෙන් පසු ඔහුට දේශීයව සංචාරය කිරීමට අවසර හිමි වන බවයි විදෙස් මාධ්‍ය වාර්තා කළේ.

ඔස්ට්‍රේලියානු මාධ්‍ය මෙම සිදුවීම වාර්තා කර ඇත්තේ එය ධනුෂ්ක ගුණතිලක ලද ජයග්‍රහණයක් ලෙසටයි.

ඔහු අඟහරුවාදා සිඩ්නි ඩව්නිං සෙන්ටර් දිස්ත්‍රික් උසාවියේ දී තමාගේ ඇප මත ලිහිල් කරන ලෙස අධිකරණයෙන් ඉල්ලා තිබුණා.

පසුගිය වසරේ T20 ලෝක කුසලානය සඳහා ඔස්ට්‍රේලියාවට පැමිණ සිටියදී සිඩ්නි නුවර නිවසක් තුළදී කාන්තාවක් දූෂණය කිරීම සම්බන්ධයෙන් ඔහුට චෝදනා එල්ලවී තිබෙනවා.

ඒ අනුව පසුගිය වසරේ නොවැම්බර් මාසයේදී ශ්‍රී ලංකාවට යාමට සූදානම්ව සිටියදී ධනුෂ්ක ගුණතිලක අත්අඩංගුවට ගත් අතර එතැන් සිට ඔහුට රට හැර යාම වළක්වමිනුයි නියෝග නිකුත් කෙරුණේ.

පසුව දැඩි කොන්දේසි සහිතව නොවැම්බර් 17 වැනි දින ඔහුට ඇප නියම වුණා.

32 හැවිරිදි ධනුෂ්ක ගුණතිලක අවස්ථා දෙකකදී ඕස්ට්‍රේලියාව තුළ සංචාරය කිරීමට ඇප කොන්දේසි වෙනස් කරන ලෙස අධිකරණයෙන් ඉල්ලා තිබෙනවා.

ඒ අනුව මේ සතියේ දින හතරකට සහ මාසය අවසානයේ දින හතරකට ගුණතිලකට අවසර දීමටයි වැඩ බලන විනිසුරු ග්‍රේම් හෙන්සන් එකඟ වී ඇත්තේ.

ඔහු ඕස්ට්‍රේලියාව තුළ සංචාරය කිරීමට අදහස් කරන්නේ නම් තම සංචාරයේ කාලසීමාව, ස්ථානය සහ ගමන් මාර්ගය සමඟ අවම වශයෙන් පැය 48කට පෙර පොලිසියට දැනුම් දිය යුතු බව අධිකරණය නියම කර තිබෙනවා.

කෙසේ වෙතත්, ධනුෂ්ක ගුණතිලක තවමත් සතියකට දින තුනක් පොලිසියට වාර්තා කළ යුතු අතර අවසර හිමිවී ඇත්තේ එක් ජංගම දුරකථනයක් ළඟ තබා ගැනීමට පමණයි.