දේශබන්දු පොලිස්පති ධුරයෙන් ඉවත්කරන යෝජනාව වැඩි ඡන්දයෙන් සම්මතයි

දේශබන්දු තෙන්නකෝන් පොලිස්පති ධුරයෙන් ඉවත් කිරීම සඳහා වන යෝජනාව වැඩි ඡන්දයෙන් පාර්ලිමේන්තුවේ දී අද (05) සම්මත වුණා.

එම යෝජනාවට පක්ෂව ඡන්ද 177ක් ලැබුණු අතර, ඊට විරුද්ධව ඡන්දය ප්‍රකාශ කර තිබුනේ නැහැ.

එක් මන්ත්‍රීවරයෙක් ඡන්දය පාවිච්චි කිරීමෙන් වැළකී සිටියා.

මෙම යෝජනාව සම්මත වූ බවට කතානායකවරයා සිදුකරන දැනුම්දීමෙන් පසු ජනාධිපතිවරයා විසින් පොලිස්පති ධුරය සඳහා ආණ්ඩුක්‍රම ව්‍යවස්ථා සභාවට පොලිස්පති ධුරය වෙනුවෙන් නමක් නිර්දේශ කිරීමට නියමිතයි.

පොලිස්පති දේශබන්දු තෙන්නකෝන්ව එම ධුරයෙන් ඉවත් කිරීම සඳහා වූ පරීක්ෂණ කමිටුවක් පත්කිරීම සඳහා වූ යෝජනාවක් ඇතුළත් ඉල්ලීමක් පාර්ලිමේන්තු මන්ත්‍රීවරුන් 115 දෙනෙකුගේ අත්සනින් යුතුව ගරු කතානායක ජගත් වික්‍රමරත්න වෙත පසුගිය මාර්තු මස භාරදෙන ලද අතර, අනතුරුව එම පරීක්ෂණ කමිටුව පත් කිරීම සඳහා වූ යෝජනාව 2025 අප්‍රේල් 08 දින පාර්ලිමේන්තුවේදී සම්මත කෙරුණා.

පසුව පොලිස්පති ටී.එම්.ඩබ්ලිව්. දේශබන්දු තෙන්නකෝන් විසින් කර ඇතැයි කියන විෂමාචාර සහ සිය ධුරයේ බලතල බරපතල අන්දමින් අනිසි ලෙස යොදාගැනීම සම්බන්ධයෙන් විමර්ශනය කර වාර්තා කිරීමට අදාළ පරීක්ෂණ කමිටුව පත් කිරීම සිදුවුණා.

එම පරීක්ෂණ කමිටුව එවකට ශ්‍රේෂ්ඨාධිකරණ විනිසුරු පී.පී. සූරසේනගේ සභාපතිත්වයෙන් සහ විනිසුරු ඩබ්ලිව්.එම්.එන්.පී. ඉද්දවල සහ ජාතික පොලිස් කොමිෂන් සභාවේ සභාපති ඊ.ඩබ්ලිව්.එම්. ලලිත් ඒකනායක යන අයගේ සාමාජිකත්වයෙන් සමන්විත වුණා.

පසුව පරීක්ෂණ කමිටුව පාර්ලිමේන්තුවේදී රැස්වී උක්ත පනතේ විධිවිධාන ප්‍රකාරව විමර්ශන සිදු කිරීමෙන් අනතුරුව මෙසේ එම පරීක්ෂණ කමිටුවේ අවසන් වාර්තාව පසුගිය ජූලි 21 දින කතානායකවරයාට භාරදීම සිදු කෙරුණා.

අනතුරුව එම වාර්තාව කතානායකවරයා විසින් ජූලි 22 දින පාර්ලිමේන්තුවේ සභාගත කරනු ලැබුවා.

පරීක්ෂණ කමිටුවේ වාර්තාවට අනුව පොලිස්පතිවරයාට එරෙහිව නගන ලද මුළු චෝදනා 23 අතරින් චෝදනා අංක 1, 2, 3, 4, 5, 6, 7, 8, 9, 10, 13, 14, 15, 16, 17, 18, 19, 22 සහ 23 සම්බන්ධයෙන් පොලිස්පතිවරයා වරදකරු බව තීරණය කර තිබුණා.