රජය විසින් පාර්ලිමේන්තුවට ඉදිරිපත් කර තිබෙන දූෂණ විරෝධී (සංශෝධන) පනත් කෙටුම්පත ආණ්ඩු ක්‍රම ව්‍යවස්ථාවට පටහැනි බවට තීන්දු කරන ලෙස ඉල්ලා ශ්‍රේෂ්ඨාධිකරණයට විශේෂ පෙත්සම් තුනක් ඉදිරිපත් කරන තිබෙනවා.
ශ්‍රී ලංකා වාණිජ මණ්ඩලයේ හිටපු සභාපති චන්ද්‍රා ප්‍රනාන්දු, සුනේත්‍රා ජයසිංහ ඇතුළු නවදෙනකු සහ ඩී.ජේ. රාජරත්නම් විසින් මෙම පෙත්සම් ගොනු කර තිබෙනවා.
එම පෙත්සම්වල වගඋත්තරකරු ලෙස නම්කර ඇත්තේ නීතිපතිවරයා යි.
පෙත්සම්කරුවන් කියා සිටින්නේ රජය විසින් පාර්ලිමේන්තුවට ඉදිරිපත් කර තිබෙන දූෂණ විරෝධී (සංශෝධන) පනත් කෙටුම්පතෙහි ඇතුලත් වගන්ති මගින් ආණඩුක්‍රම ව්‍යවස්ථාවේ ඇතුළත් විධිවිධාන උල්ලංඝනය වීමක් සිදු වන බවයි.
ඒ අනුව අදාළ එම පනත් කෙටුම්පත සම්මත කිරීමට නම් පාර්ලිමේන්තුවේ තුනෙන් දෙකක බහුතර ඡන්දයෙන් සහ ජනමත විචාරණයකින් අනුමත විය යුතු බවට තීන්දු කරන ලෙස මෙම පෙත්සම් මගින් ශ්‍රේෂ්ඨාධිකරණයෙන් ඉල්ලා තිබෙනවා.
