ත්‍රස්තවාදීන්ගේ ප්‍රහාරයකින් මීට වසර 27කට පෙර ඝාතනයට ලක්වූ දිඹුලාගල හාමුදුරුවෝ හෙවත් මාතර කිතලගම ශ්‍රී සීලාලංකාර නාහිමියන් ගෙනගිය ආගමික, ශාසනික, ජාතික, මෙහෙවර සිදු කිරීමට තමා උපරිම ක්‍රියා කරන බව අභිනයෙන්, පත්වූ ඓතිහාසික දිඹුලාගල ආරණ්‍ය සේනාසනාධිපති දිඹුලාගල රාහුලාලංකාර නාහිමියන් පවසනවා.
දිඹුලාගල බුද්ධ ශ්‍රාවක සංඝ සභාව, දායක කාරකාදීන් මෙන්ම ප්‍රදේශවාසීන් විසින් අද දිඹුලාගල ආරණ්‍ය සේනාසනයේ සූදානම් කර තිබූ දිඹුලාගල නාහිමි පිළිගැනීමේ උත්සවයකට වැඩම කරමිනුයි උන්වහන්සේ මේ බව කියාසිටියේ.
අමරපුර ධර්මරක්ඛිත මහා නිකායේ මහානායක අතිපූජ්‍ය ත්‍රිකුණාමලයේ ආනන්ද නායක ස්වාමීන් වහන්සේ විසින් පසුගිය 27 වනදා ඓතිහාසික දිඹුලාගල ආරණ්‍ය සේනාසනයේ අභිනව ආරණ්‍ය සේනාසනාධිපති ලෙස දිඹුලාගල රාහුලාලංකාර නාහිමියන් පත් කරනු ලැබුවා.
උන්වහන්සේ පිළිගැනීමේ උත්සවය දිඹුලාගල ආරණ්‍ය සේනාසනයේ පැවති අතර මෙහි දී අපවත් වී වදාළ මාතර කිතලගම ශ්‍රී සීලාලංකාර නාහිමියන් වහන්සේ සහ මල්දෙණියේ ජිනාලංකාර නායක ස්වාමීන් වහන්සේලාගේ පිළිරුවට පුෂ්පෝපහාර දැක්වීමට ද රාහුලාලංකාර නාහිමියන් කටයුතු කළා.
දිඹුලාගල රාහුලාලංකාර නාහිමියන් ඓතිහාසික දිඹුලාගල ආරණ්‍ය සේනාසනයේ පස්වන වරට පත් සේනාසනාධිපති නායක ස්වාමීන් වහන්සේයි.
ඓතිහාසික දිඹුලාගල ආරණ්‍ය සේනාසනයට වෙහෙර විහාරස්ථාන 120 කට ආසන්න සංඛ්‍යාවක්, පිරිවෙන් 5ක් මෙන්ම විශාල භික්ෂූන් වහන්සේලා සංඛ්‍යාවක් ද ඇතුළත්.
ආරණ්‍ය සේනාසනයේ සංවර්ධනය වෙනුවෙන් සහ උතුරුමැද, නැගෙනහිර දෙපළාතේ ජනතාව මෙන්ම ප්‍රදේශයේ ගොවි කම්කරුවන් මුහුණ දෙන ගැටලුවලට තමා සෘජුවම සම්බන්ධ වෙමින්, ඒවා විසඳීමට පවතින රජයත්, දේශපාලන අධිකාරියත් සමඟ ක්‍රියා කරන බව ද නා හිමියන් සඳහන් කළා.
පළාතේ ගොවි ජනතාව සහ ජනතාව පොදුවේ මුහුණ දෙන පොදු ගැටළු කඩිනමින් විසඳා ගැනීමට දිඹුලාගල නාහිමියන් ක්‍රියා කළ ආකාරයෙන් මහා සංඝරත්නය, හා ජනතාව තමා කෙරෙහි තැබූ විශ්වාසය කඩ නොකරන බව ද මෙහිදී අනුශාසනාවක් සිදු කරමින් රාහුලාලංකාර නාහිමියන් ප්‍රකාශ කළා.
