මව විසින් දම්වැලකින් බැඳ මාස 06කට ආසන්න කාලයක් කාමරයක සිරකරගෙන සිටි බව කියන 17 හැවිරිදි පිරිමි ළමයෙකු පිළිබඳ පුවතක් ඉන්දීය මාධ්ය අද (08) වාර්තා කර තිබෙනවා.
ගුජරාටයේ, බනස්කාන්ත හි ඩීසා ප්රදේශයේ නිවසක් තුළ මෙම ළමයා මෙලෙස සිරකරගෙන සිට ඇති බවයි වාර්තා වන්නේ.
මේ සම්බන්ධයෙන් ලැබුණු තොරතුරක් මත පොලිසිය සහ ළමා සුභසාධන කමිටුවටක් විසින් ඔහුව ඉන් මුදා ගැනීමට පසුගිය 03 වනදා කටයුතු කර තිබෙනවා.
කොටස් වෙළඳපොලවල ආයෝජනය කිරීමට පුරුදුව සිටි මෙම දරුවාගේ පියා ඉන් විශාල වශයෙන් පාඩු විඳීමට සිදුවීමත් සමඟ
පසුගිය වසරේ ජුනි මාසයේ දී පිට පළාතක රැකියාවක් සඳහා නිවසින් පිටව ගොස් තිබෙනවා.
කෙසේ වෙතත් එදින සිට මේ දක්වා ඔහු යළිත් නිවස පැමිණ නොමැති බවයි වාර්තා වන්නේ.
මෙලෙස සැමියාගේ අතුරුදහන්වීමෙන් පසු කාන්තාව අනාරක්ෂිත වූ අතර, ඇය තම පුතාට නිවසින් පිටව යාමට ඉඩ ලබා දී නොමැති බව සඳහන්.
සැමියාගේ අතුරුදන්වීමත් සමඟ ඇය මානසික ව්යාකූලතාවයකින් පෙළීම නිසා මෙලෙස සිය පුත්රයා නිවස තුළ මාස 06කට ආසන්න කාලයක් සිරකරගෙන සිට ඇති බවයි කරුණු අනාවරණය වී ඇත්තේ.
මෙම පිරිමි ළමයා පසුගිය වසරේ ජුලි මාසයේ සිට පාසලට ගොස් හෝ ඔහුගේ මිතුරන් හමුවීමට ගොස් නොමැති බවයි වාර්තා වන්නේ.
ළමයා දම්වැල්වලින් මුදාගැනීමට පොලිසිය විසින් මවගෙන් එහි යතුරු ඉල්ලා ඇති අතර, එම අවස්ථාවේ දී ඇය යතුරු ලබාදීම ප්රතික්ෂේප කර තිබෙනවා.
මේ හේතුවෙන් දම්වැලේ අඟුලු කඩාදමා ඉන් ළමයාව මුදාගෙන පලන්පූර් ප්රදේශයේ පිහිටි ළමා නිවාසයක් වෙත යොමු කිරීමටයි කටයුතු කර ඇත්තේ.
මව ප්රතිකාර සඳහා රජයේ රෝහලකට ඇතුළත් කර ඇති අතර, නිවස තුළ සිදුව ඇති සිද්ධිය සම්බන්ධයෙන් එම කාන්තාවගේ විවාහක දියණියන් දෙදෙනාව දැනුවත් කිරීමට පොලිසිය කටයුතු කර තිබෙනවා.
පොලිසිය මේ සම්බන්ධයෙන් දැනුම්වත් කරන තුරු මවගේ නිවස තුළ සිය සහෝදරයා මේ ආකාරයෙන් සිරකරගෙන සිටින බවට තමන් නොදැන සිටි බවයි දියණියන් දෙදෙනා පවසා ඇත්තේ.
