තුර්කියට සහ සිරියාවට බලපෑම් එල්ල කළ භූ කම්පනවලින් මියගිය සංඛ්‍යාව 50000 ඉක්මවා ගොස් තිබෙනවා.
මෑත ඉතිහාසයේ සිදුවූ දරුණුතම ව්‍යසනය හේතුවෙන් තුර්කියේ මහල් නිවාස 520,000ක් සහිත ගොඩනැගිලි 160,000කට අධික ප්‍රමාණයක් විනාශ වී ඇති බවයි වාර්තා වන්නේ.
භූමිකම්පාවලින් ගොඩනැගිලි කඩා වැටීමට වගකිව යුතු බවට සැක කෙරෙන පුද්ගලයන් 184 දෙනෙකු අත්අඩංගුවට ගෙන තිබෙනවා.
පසුගිය 6 වන දින ඇතිවූ භූ කම්පනයෙන් තුර්කියේ පමණක් මරණ 44,128ක් සිදුවී තිබෙනවා.
තුර්කි අධිකරණ අමාත්‍ය Bekir Bozdag පැවසුවේ, ආපදාවට ලක්වූ පළාත් 10ක කඩා වැටුණු ගොඩනැගිලි සම්බන්ධයෙන් පුද්ගලයින් 600කට වැඩි පිරිසකගෙන් ප්‍රකාශ ලබාගෙන ඇති බවයි.
අත්අඩංගුවට ගෙන රක්ෂිත බන්ධනාගාර ගත කර සිටින පිරිස අතර ඉදිකිරීම් කොන්ත්‍රාත්කරුවන් 79 දෙනෙකු, ගොඩනැගිලි සම්බන්ධයෙන් නීත්‍යානුකූල වගකීම් දරන පුද්ගලයින් 74 දෙනෙකු, දේපල හිමියන් 13 දෙනෙකු සහ ගොඩනැගිලි වෙනස් කිරීම් සිදුකළ පුද්ගලයින් 18 දෙනෙකු ඇතුළත්.
ව්‍යසනයෙන් නිවාස අහිමි වූ මිලියන දෙකකට ආසන්න ජනතාවක් කලාපයේ සහ රටේ අනෙකුත් ප්‍රදේශවල කූඩාරම්, බහාලුම් නිවාස සහ අනෙකුත් පහසුකම්වල නවාතැන් ගෙන සිටින බව තුර්කියේ ආපදා කළමනාකරණ අධිකාරිය පවසනවා.
භූමිකම්පා කලාපයේ කූඩාරම් 335,000 කට වැඩි ප්‍රමාණයක් ඉදිකර ඇති අතර ස්ථාන 130ක බහාලුම් නිවාස ස්ථාපිත කර තිබෙනවා. එමෙන්ම 530,000 කට ආසන්න පිරිසක් විපතට පත් ප්‍රදේශවලින් ඉවත් කර ඇති බවයි තුර්කි බලධාරීන් ප්‍රකාශ කළේ.
