සමගි ජන බලවේගයේ විනය කමිටුව විසින් තමාට එරෙහිව විනය පියවර ගැනීමට ගියහොත් හෝ තමන් වෙත අනිසි බලපෑම් කිරීමට උත්සාහ කළහොත් සේනක ද සිල්වා වන තම සැමියා ලබාදුන් වත්මන් සමගි ජන බලවේගය පක්ෂය සතුව පවතින, ප්‍රසිද්ධියේ හෙළි කිරීමට නොහැකි නීතිමය සහ වෙනත් රහස් තොරතුරු ජනතාව හමුවේ හෙළි කිරීමට හා තම පක්ෂයේ අයිතිය වෙනුවෙන් අධිකරණය හමුවේ ක්‍රියාමාර්ග ගැනීමට යොමුවන බව සමගි ජන බලවේගය පාර්ලිමේන්තු මන්ත්‍රී ඩයනා ගමගේ මහත්මිය විසින් විපක්ෂ නායක සජිත් ප්‍රේමදාස මහතා වෙත දැනුම් දී තිබෙනවා.
ඇය මේ බව සජිත් ප්‍රේමදාස මහතා වෙත දැනුම් දී ඇත්තේ පසුගිය 10 වන දා සමගි ජන බලවේගයේ විනය කමිටුවේ සුදත් වික්‍රමරත්න මහතා විසින් ඇයට එරෙහිව විනය කඩ කිරීමක් පිළිබඳව එවා තිබූ ලිපියකට ප්‍රතිචාර දක්වමිනුයි.
එහි දී පාර්ලිමේන්තුවට ඉදිරිපත් වූ විසිවැනි ව්‍යවස්ථා සංශෝධන කෙටුම්පතට විරුද්ධව ඡන්දය ලබා දෙන මෙන් සමගි ජන බලවේගය විසින් පක්ෂයේ සෑම මන්ත්‍රීවරයෙකුටම “ත්‍රිත්ව ඉරි නිවේදනයක්” මගින් දැනුම් දී තිබියදී විසිවන සංශෝධනය දෙවන වර හා තෙවන වර කියවීමේ විවාදයේදී එයට පක්ෂව ඡන්දය ලබා දීම පක්ෂයේ විනය කඩකිරීමක් ලෙස එම ලිපියේ දක්වා තිබී ඇති අතර සම්බන්ධයෙන් ඇයට එරෙහිව චෝදනා පත්‍රයක් ඉදිරිපත් කර තිබුණා.
මෙයට ප්‍රතිචාර දක්වමින් ඩයනා ගමගේ මන්ත්‍රීවරිය පෙන්වා දෙන්නේ තම සැමියාගේ පක්ෂය ලබා ගැනීමේ දී ඇති කර ගත් රහස් එකගතා කඩ කරමින් මෙවැනි ලිපි තවදුරටත් තමන් වෙත යොමු කළහොත් ඊට එරෙහිව පියවර ගැනීමට කටයුතු කරන බවයි.
තම තමන්ට මෙවැනි චෝදනා එල්ල කළහොත් සජිත් ප්‍රේමදාස මහතාගේ විපක්ෂ නායක ධූරය සහ සමගි ජන බලවේගය පක්ෂය පවා අහිමි විය හැකි බව ඩයනා ගමගේ මන්ත්‍රීවරිය මෙයින් පෙන්වා දී තිබෙනවා.
එම නිසා තවත් මෙවැනි විහිළු සහගත ලිපි “විනය කරුණු” යන ශීර්ෂ පාඨය යටතේ තමා වෙත නොඑවන ලෙසත් එසේ ලැබුණහොත් මාධ්‍ය වෙත සහ ජනතාව ඉදිරියේ අදාළ රහස් හෙළිදරව් කරන බවටත් විපක්ෂනායකවරයා වෙත ඩයනා ගමගේ මන්ත්‍රීවරිය යවා ඇති ලිපියේ සඳහන්.
පහතින් සඳහන් වන්නේ නීතිඥ සුදත් වික්‍රමරත්න මහතා ඩයනා ගමගේ මන්ත්‍රීවරිය වෙත යොමුකර ඇති ලිපියයි.
