ඩෙංගු හා පූර්ණ රුධිර පරීක්ෂණ සඳහා ගැසට් කරන ලද නියමිත ගාස්තුවට වඩා වැඩි මුදලක් අය කළ පෞද්ගලික රෝහල් සහ රසායනාගාර දොළහක් සඳහා රුපියල් ලක්ෂ 94ක දඩ මුදලක් අධිකරණ මගින් නියම කර ඇතැයි පාරිභෝගික කටයුතු අධිකාරියේ ජේෂ්ඨ විමර්ශන නිලධාරී ඒ . යු. රංජන පවසා තිබෙනවා.
කොළඹ , නුගේගොඩ , මාලිගාකන්ද හා ගල්කිස්ස යන අධිකරණවලින් එම දඩ මුදල් නියමකර ඇතැයි ජේෂ්ඨ විමර්ශන නිලධාරියා වැඩිදුරටත් පවසා තිබෙනවා.
කොළඹ දිස්ත්‍රික් විශේෂ වැටලීම් ඒකකය මගින් පරීක්ෂණ ගාස්තු සම්බන්ධයෙන් පසුගිය මාස 4 තුළ සිදුකළ විමර්ශනවලදී වැඩි මුදලක් අය කිරීම සම්බන්ධයෙන් අනාවරණය වූ තොරතුරු අනුව නඩු පැවරීමෙන් අනතුරුව එකී දඩ මුදල නියම කර තිබෙනවා.
ඊට අමතරව අනෙකුත් පරීක්ෂණ ගාස්තු සම්බන්ධයෙන් විවිධ මධ්‍යස්ථානවල විවිධ ගාස්තු අය කිරීම සම්බන්ධයෙන් දැනට පාරිභෝගික කටයුතු අධිකාරියට මැදිහත්වීමේ අවකාශයක් නොමැති බවත් නමුත් බහුලව භාවිතා වන රසායනගාර පරීක්ෂණ කිහිපයක් සම්බන්ධයෙන් යම් මිල සීමාවක් පැනවීම සම්බන්ධයෙන් යෝජනා හා මූලික කටයුතු මේ වන විට සිදුවෙමින් පවතින බව ජේෂ්ඨ විමර්ශන නිලධාරියා වැඩිදුරටත් පැවසු බව අප වාර්තාකරු පවසනවා.
