සමාජ ක්රියාකාරිකයකු වන ඩෑන් ප්රියසාද් මහතාට වෙඩි තබා ඝාතනය කිරීමේ සිද්ධිය සම්බන්ධයෙන් වැල්ලම්පිටිය පොලිසිය විසින් කොළඹ ප්රධාන මහේස්ත්රාත් අධිකරණයට කරුණු වාර්තා කර තිබෙනවා.
දසත අධිකරණ වාර්තාකාරිණිය පැවසුවේ, එහිදී පොලිසිය අධිකරණය හමුවේ කරුණු දක්වමින් මෙම අපරාධයට පිය – පුතු දෙදෙනෙකුගේ සම්බන්ධයක් පවතින බවට සැක කළ හැකි තොරතුරු පරීක්ෂණවල දී හෙළි වී ඇති බවයි.
ඒ අනුව බන්දුල පියල් හා මාධව සුදර්ශන යන පිය පුතු දෙදෙනාගේ විදේශ ගමන් තහනම් කිරීමේ නියෝගයක් නිකුත් කරන ලෙසත් ඔවුන්ගේ දුරකථන වාර්තා කැඳවීමේ නියෝගයක් නිකුත් කරන ලෙසත් පොලිසිය අද (23) අධිකරණයෙන් ඉල්ලා සිටියා.
එම ඉල්ලීමට අවසර දුන් කොළඹ අතිරේක මහේස්ත්රාත් හර්ෂණ කැකුණවල අදාළ පුද්ගලයින් දෙදෙනා විදේශගතවීම වළක්වාලමින් ආගමන හා විගමන පාලකවරයා ඇතුළු නිලධාරීන් වෙත නියෝගයක් ද නිකුත් කළා.
වැඩිදුරටත් කරුණු දැක්වූ පොලිසිය මියගිය තැනැත්තාගේ සහෝදරයකු වන තිළිණ ප්රසාද් නමැත්තා මීට වසර කිහිපයකට ඉහතදී කපා කොටා මරා දමා තිබූ බවත්, ඒ සම්බන්ධයෙන් මෙම පිය පුතු දෙදෙනාට එරෙහිව අධිකරණය හමුවේ නඩුවක් පවතින බවත්, සඳහන් කර සිටියා.
මෙම සිද්ධියට අදාළ ව මේ වන විට පුද්ගලයින් 10 දෙනෙකුගෙන් පමණ ප්රකාශ සටහන් කරගෙන තිබෙන බවත්, ඒ අනුව ඉදිරි විමර්ශන සිදු කරන බවත් පොලිසිය අධිකරණයට දන්වා සිටියා.
මෙම සිද්ධියට අදාළව මහේස්ත්රාත්වරයා විසින් අපරාධය සිදු වූ ස්ථානයට ගොස් ස්ථානීය පරීක්ෂණයක් සිදු කිරීමට ද නියමිතව තිබෙනවා.
මේ අතර ඩෑන් ප්රියසාද් වෙඩි තබා ඝාතනය කිරීමේ සිද්ධිය විමර්ශනය කිරීම සඳහා පොලිස් කණ්ඩායම් 6ක් යොදවා ඇති බව පොලිසිය සඳහන් කරනවා.
පොලීසිය සැකපළ කරන්නේ එම ඝාතනය සංවිධානාත්මක අපරාධ කල්ලි සාමාජිකයෙකු වන කංජිපානි ඉම්රාන්ගේ පාර්ශ්වය විසින් සිදු කරන්නට ඇති බවයි.
ඊයේ (22) රාත්රී වැල්ලම්පිටිය ලක්සඳ සෙවණ මහල් නිවාස සංකීර්ණයේ උඩු මහලකදී සමාජ ක්රියාකාරී ඩෑන් ප්රියසාද්ට වෙඩිතැබීමක් සිදුකර තිබුණා.
යතුරුපැදියකින් පැමිණි පුද්ගලයින් දෙදෙනෙකු වෙඩි තැබීම සිදුකර පලාගොස් ඇති බවයි පොලීසිය පැවසුවේ.
සාදයක් අතරතුර මෙම වෙඩි තැබීම සිදුව ඇති බවට පොලීසිය සිදුකළ මූලික විමර්ශනවල දී අනාවරණය වුණා.
පිස්තෝල වර්ගයේ ගිනිඅවියක් යොදා ගනමින් මෙම වෙඩි තැබීම සිදුකර ඇති අතර වෙඩි වැදීමෙන් තුවාල ලැබූ ඩෑන් ප්රියසාද් කොළඹ ජාතික රෝහලට ඇතුළත් කෙරුණා.
එහිදී අසාධ්ය තත්ත්වයේ පසු වූ ඔහු ජීවිතක්ෂයට පත් වූ බව රෝහල් ආරංචි මාර්ග සඳහන් කළා.
වෙඩි ප්රහාර දෙකක් ඔහුගේ උරහිස ප්රදේශයට සහ තවත් වෙඩි ප්රහාර දෙකක් ඔහුගේ පපුව ප්රදේශයට එල්ල වී තිබූ බව ද එහිදී රෝහල් ප්රකාශකයෙකු සඳහන් කළා.
