ඇදහැලුණු ධාරාණිපාත වර්ෂාව හේතුවෙන් ශ්‍රී ලංකා කණ්ඩායම පරාජයට පත් කිරීම සඳහා නවසීලන්තයට ලකුණු 221ක ඉලක්කයක් හිමි ව තිබෙනවා.
ඒ පන්දුවාර 27ක් තුළදියි.
චරිත් අසලංක 05 වැනි කඩුල්ලට දැවී යාමත් සමග නැවතත් ක්‍රීඩාංගණයට වර්ෂාවෙන් බාධා එල්ල වුණු අතර ශ්‍රී ලංකා කණ්ඩායම පන්දුවාර 49කුත් පන්දු 02ක් ක්‍රීඩා කරමින් සිටියදී ලකුණු 324ක දි තරගය තාවකාලිකව නතර කෙරුණා.
ඉන් අනතුරුව වර්ෂාව පැයකට අධික කාලයක් පැවති හෙයින් ක්‍රිකට් තීරකයින්ගේ තීරණය වූයේ ඩක්වත් ලුවිස් න්‍යායයට අනුව ක්‍රීඩා කිරීමටයි.
ඒ අනුවයි නවසීලන්තයට මෙම ඉලක්කය (221) හිමිවූයේ.
මේ වනවිට නවසීලන්තය ජයග්‍රාහී ලකුණු 221ක් හඹා යෑම ආරම්භ කර ඇති අතර කිසිවෙකු නොදැවී ලකුණු 10ක් ලබා සිටිනවා.
ඒ පන්දුවාර 02ක් අවසානයේ දියි.
ආරම්භක පිතිකරුවන් ලෙස පිටියට පැමිණ ඇත්තේ විල් යන්ග් සමගින් ටිම් රොබින්සන්.
තරගයේ කාසියේ වාසිය දිනා ගත් ශ්‍රී ලංකා නායක චරිත් අසලංක පළමුව පන්දුවට පහරදීමට තීරණය කළා.
ඊට සාර්ථක ආරම්භයක් ලබාදීමට පිටියට පිවිසි පැතුම් නිස්සංක සහ අවිශ්ක ප්‍රනාන්දුට එය ඉටු කරගැනීමට නොහැකි වූයේ මුල් අවස්ථාවේ දී ම පැතුම් නිස්සංක ලකුණු 12කට ඩෆීගේ පන්දුවක් හමුවේ දැවී යාම හේතුවෙන්.
ඉන් අනතුරුව පිටියට පිවිසි කුසල් මෙන්ඩිස් සමග එක් වූ අවිශ්ක ප්‍රනාන්දු එතෙක් මෙතෙක් ශ්‍රී ලංකා එක්දින ක්‍රිකට් ඉතිහාසයේ දෙවැනි කඩුල්ල වෙනුවෙන් උපුල් තරංග සහ සනත් ජයසූරිය 2006 දී තබා තිබූ ලකුණු 201ක විශිෂ්ට සබඳතාව ද පසුකර ගියේ ඔවුන් දෙදෙනා අතර ලකුණු 206ක සබඳතාවක් ගොඩනගමින්.
කුසල් මෙන්ඩිස් සහ අවිශ්ක එක්දින පිටියේ ඔවුන් ලබාගත් සිව්වැනි ශතක ලබා ගැනීමට ද සමත් වුණා.
දෙවැනි කඩුල්ල වෙනුවෙන් අවිශ්ක ප්‍රනාන්දු සොදිගේ පන්දුවක් හමුවේ ලකුණු 100ක දැවී ගියා.
ඉන් අනතුරුව පිටියට ආ සදීර සමරවික්‍රම ලකුණු 05කට දැවී යද්දී කුසල් මෙන්ඩිස් ලකුණු 143කට ඩෆීගේ පන්දුවක් හමුවේ ක්‍රීඩා පිටියෙන් ඉවත් වුණා.
චරිත් අසලංක සමග එක් වූ ජනිත් ලියනගේ ශ්‍රී ලංකා ලකුණු පුවරුව ලකුණු 300 සීමාව ඉක්මවා යාමට තරම් වග බලා ගත්තා.
අසලංක ලකුණු 40ක් රැස් කළේ පන්දු 40කටයි.
ඊට වේගවත් හයේ පහර 02ක් සහ හතරේ පහර 03ක් ඇතුළත්.
අසලංකගේ පිතිකරණයේ නිමාව ඩෆී විසින් සනිටුහන් කරනු ලැබුවා.
ජනිත් ලියනගේ නොදැවී ලකුණු 12යි.
කඩුලු බිඳ දැමීමේ දී ජැකොබ් ඩෆී කඩුලු 03ක් සහ ඉෂ් සොදි සහ මයිකල් බ්‍රාස්වෙල් එක් කඩුල්ලක් බැගින් බිඳ හෙලුවා.
