ටෙස්ට් තරගයකින් ක්‍රිකට් වාර්තා අලුත් වෙයි

ක්‍රිකට් ඉතිහාසයේ අඩුම කාලයකින් අවසන් වූ ටෙස්ට් ක්‍රිකට් තරගය ලෙසට සංචාරක ඉන්දීය කණ්ඩායම සහ දකුණු අප්‍රිකාව අතර පැවති දෙවන ටෙස්ට් තරගය අද වාර්තා අතරට එක්වුණා.

කේප්ටවුන්හිදී මෙම තරගය ආරම්භ වූයේ ඊයේ දිනයේදීයි. කාසියේ වාසිය දිනූ දකුණු අප්‍රිකාව පළමුවෙන් පන්දුවට පහරදුන් අතර පළමු ඉනිම වෙනුවෙන් ඔවුන් රැස් කළේ ලකුණු 55ක් පමණයි.

ඉන්දියාව පළමු ඉනිම වෙනුවෙන් සියලුදෙනා දැවී ලකුණු 153ක් ලබා ගත්තා. දකුණු අප්‍රිකා දෙවන ඉනිම ලකුණු 176කට සීමා වූ අතර ඉන්දීය කණ්ඩායම දෙවන ඉනිම වෙනුවෙන් කඩුලු 3කට ලකුණු 80ක් ලබා කඩුලු 7කින් තරගය ජය ගත්තා.

දකුණු අප්‍රිකා දෙවන ඉනිමේදී ඒඩ්න් මාක්‍රම් විශිෂ්ඨ ශතකයක් ලබාගත්තේ පන්දු 103කින් ලකුණු 106ක් ලබා ගනිමින්.

සංචාරක ඉන්දීය කණ්ඩායම සමග පැවති පළමු ටෙස්ට් තරගය දකුණු අප්‍රිකාව ජය ගත්තේ ඉනිමකින් සහ ලකුණු 32කින්.

අද අවසන් වූ දෙවන තරගය මෙතෙක් පැවති කෙටිම ටෙස්ට් තරගය ලෙසටයි වාර්තා අතරට එක් වන්නේ. සමස්ත තරගය පුරා ම යවා ඇත්තේ පන්දු 642ක් පමණයි.

එමෙන්ම මෙය කේප්ටවුන්හිදී ඉන්දියාව ලැබූ පළමු ටෙස්ට් ජයග්‍රහණය ද වනවා.