එළඹෙන ජුනි මාසය වනවිට මෙරට උසස් පෙළ සහිත පාසල් ඩිජිටල්කරණයට ලක් කරමින් අධ්යාපන කටයුතු සිදු කරගෙන යාමට දරුවන්ට අවස්ථාව සලසා දෙන බව අධ්යාපන අමාත්ය ආචාර්ය සුසිල් ප්රේමජයන්ත පවසනවා.
අධ්යාපන අමාත්යාංශයේ අරමුණ රටේ සියලු දරුවන්ට අධ්යාපනයේ සමාන අවස්ථා අත්පත්කරදීම බවත්, එහි එක් පියවරක් වශයෙන් එළඹෙන ජුනි මාසය වනවිට මෙරට උසස් පෙළ සහිත පාසල් ඩිජිටල්කරණයට ලක්කරමින් නව තාක්ෂණය සමඟ සෘජුව සම්බන්ධ වෙමින් අධ්යාපන කටයුතු සිදු කරගෙන යාමට දරුවන්ට අවස්ථාව සලසා දෙන බවයි ඔහු සදහන් කළේ.
අමාත්යවරයා මේ අදහස් පළ කළේ, අද (05) දින යාපනය හින්දු විද්යාලයේ පැවති උත්සව අවස්ථාවකට එක්වෙමින්.
ඒ අනුව, මෙරට උසස් පෙළ සහිත පාසල් 3,000 ඩිජිටල්කරණයට ලක් කෙරෙන අතර, මීට අදාළව ගුරුවරුන් පුහුණු කිරීම එළඹෙන මාර්තු මාසයේ සිට ආරම්භ කරන බවත්, අදාළ පාසල් සියල්ලට ම සුහුරු පුවරු ලබාදෙන බවත් (Smart Interactive Board) අමාත්යවරයා සඳහන් කළා.
මීට සමගාමී ව සෑම අධ්යාපන කලාපයක ම පිහිටුවා ඇති පරිගණක සම්පත් මධ්යස්ථාන යාවත්කාලීන කර ඇති බව ද, අමාත්යවරයා පෙන්වා දුන්නා.
මීට වසර එකහමාරකට පෙර රට පුරා තෙල් පෝලිම් පැවති, විදුලිය කප්පාදු වූ, ගෑස් නොතිබුණු, පාසල් වසා තිබූ අභියෝගාත්මක කාලවකවානුවක අධ්යාපන විෂය භාර අමාත්ය ධුරය තමා භාරගත් බවත්, එම තත්වයෙන් අත්මිදෙමින් නැවත ක්රමවත් ව පාසල් පද්ධතිය පවත්වාගෙන යාමට ඉතා කෙටි කාලයක් තුළ අවශ්ය නිවැරදි තීන්දු තීරණ ගැනීමට හැකි වූ බවත් සිහිපත් කළා.
දරුවන් වෙනුවෙන් රටේ අධ්යාපන පද්ධතිය සංවර්ධනය කරලීම සඳහා සියලු දෙනාගේ කැපවීම අත්යවශ්ය වන බව ද, ඉදිරි සති කිහිපය තුළ රටේ සෑම පළාතකට ම ගොස් මේ සම්බන්ධයෙන් සියලු අධ්යාපන බලධාරීන් දැනුවත් කිරීමට තමා අපේක්ෂා කරන බවයි වැඩිදුරටත් ඔහු ප්රකාශ කළේ.
