ශ්‍රී ලංකා පොදුජන පෙරමුණ අද (22) පැවැත්වූ මහා සභා රැස්වීම කිසිසේත්ම නීත්‍යානුකූල නොවන බව ශ්‍රී ලංකා පොදුජන පෙරමුණේ හිටපු සභාපති, පාර්ලිමේන්තු මන්ත්‍රී ජී. එල්. පීරිස් පවසනවා.
නිවේදනයක් නිකුත් කරමින් ඔහු සඳහන් කළේ එම මහ සභා රැස්වීමේ තීරණ නීති විරෝධී බව ප්‍රකාශ කිරීමට සුදුසු අධිකරණ ක්‍රියාමාර්ගවලට අවතීර්ණ වන බවයි.
අදාළ රැස්වීමේදී ගන්නා ලද සියලුම තීරණ ශුන්‍ය සහ ක්‍රියා විරහිත වන බවත් ඒවාට කිසිම වලංගුතාවක් නොමැති බවත් පීරිස් මහතා එම නිවේදනයෙන් වැඩිදුරටත් පෙන්වා දී තිබෙනවා.
ශ්‍රී ලංකා පොදුජන පෙරමුණේ නව සභාපතිවරයා ලෙසට අද ජ්‍යෙෂ්ඨ මහාචාර්ය පුජ්‍ය උතුරාවල ධම්මරතන හිමියන් පත්කරනු ලැබුවා.
පක්ෂයේ ප්‍රධාන ලේකම් සාගර කාරියවසම් සඳහන් කළේ පක්ෂයේ මහා සභා රැස්වීමේදී මෙම පත් කිරීම සිදු කළ බවයි.
පක්ෂ සභාපති ලෙස ජ්‍යෙෂ්ඨ මහාචාර්ය පූජ්‍ය උතුරාවල ධම්මරතන හිමි ඒකමතිකව පත් කර ගැනීම සිදු වූ බව සඳහන්.
මෙම නව පත් කිරීම සිදු කර ඇත්තේ එම පක්ෂයෙන් ස්වාධීන වී කටයුතු කරන මහාචාර්ය ජී. එල්. පීරිස් දරන ලද සභාපති ධුරය සඳහා යි.
ශ්‍රී ලංකා පොදුජන පෙරමුණේ 2023 වර්ෂය සඳහා වන මහ සභා රැස්වීම අද පෙරවරුවේ පක්ෂ කාර්යාලයේදී පක්ෂ නායක, හිටපු ජනාධිපති මහින්ද රාජපක්ෂගේ ප්‍රධානත්වයෙන් ආරම්භ වුණා.
අද පැවැත්වෙන මහ සභා රැස්වීමට එම පෙරමුණේ සභාපතිවරයා ලෙස සහභාගීවීමට පාර්ලිමේන්තු මන්ත්‍රී මහාචාර්ය ජී.එල්. පීරිස්ට පක්ෂ ලේකම්වරයා විසින් ලිපියක් මඟින් දැනුම්දී තිබුණ ද ඔහු ඊට සහභාගීවීම ප්‍රතික්ෂේප කර ඇති බවයි වාර්තා වූයේ.
ඒ අනුව අද මහ සභා රැස්වීම පක්ෂ සභාපතිවරයා නොමැතිව පැවති අතර එහිදී පක්ෂය සඳහා නව නිලධාරී මණ්ඩලය පත් කර ගැනීම සිදු කෙරුණා.
ඒ අනුව පක්ෂ නායකයා ලෙස හිටපු ජනාධිපති මහින්ද රාජපක්ෂ තවදුරටත් කටයුතු කරනවා. පක්ෂයේ සෙසු තනතුරුවල වෙනසක් සිදුවී නොමැති බව ද වාර්තා වනවා.
wpDiscuz
