ඉන්දියානු සාගරයේ උපායමාර්ගික පිහිටීම නිසා ශ්රී ලංකාව කලාපීය සමුද්රීය ආරක්ෂාව සම්බන්ධයෙන් තීරණාත්මක කාර්යභාරයක් ඉටු කරන බවත්, ජාතික ආරක්ෂාව සහ සමුද්රීය කලාපීය දැනුවත්භාවය තුළ සමුද්රීය ආරක්ෂක උපාය මාර්ගය වැදගත්ම අංගය ලෙස සලකන බව ද ආරක්ෂක අමාත්යාංශය නිවේදනය කරනවා.
මෙම තීරණාත්මක කරුණු ඉස්මතු කරමින්, නියෝජ්ය ආරක්ෂක අමාත්ය (විශ්රාමික) මේජර් ජෙනරල් අරුණ ජයසේකර, පෙරේදා (02) කොළඹ වරායේ නැංගුරම් ලා තිබෙන ජපාන සමුද්රීය ස්වයං ආරක්ෂක බලකායේ (JMSDF) Mine Sweeper Tender JS Bungo නෞකාවේ සිදු කළ සංචාරයේ දී සමුද්රීය ආරක්ෂාව සඳහා ශ්රී ලංකාවේ කැපවීම අවධාරණය කෙරුණා.
2025 වාර්ෂික ඉන්දු – පැසිෆික් සහ මැද පෙරදිග මුර සංචාරයන්ට සමගාමීව ජපාන සමුද්රීය ස්වයං ආරක්ෂක බලකායේ නෞකා දෙකක් වන JS Bungo සහ JS Etajima පැමිණීම සනිටුහන් කරමින් මෙම උත්සවය සංවිධානය කරනු ලැබුවා.
නියෝජ්ය අමාත්යවරයා සිය කතාවේදී, විවිධ ක්ෂේත්ර හරහා ශ්රී ලංකාවට දිගුකාලීන සහ ස්ථිරසාර හවුල්කරුවෙකු ලෙස ජපානයේ කාර්යභාරය අවධාරණය කරමින් මූල්ය ආධාර සැපයීම, තාක්ෂණික සහයෝගීතාව, සංවර්ධන ව්යාපෘති ක්රියාත්මක කිරීම, මානුෂීය ආධාර සැපයීම, ධාරිතා ගොඩනැගීමේ මුලපිරීම්, සාම සාධක දායකත්වයන්, ආරක්ෂක සහයෝගීතාව, සමුද්රීය ආරක්ෂාව වැඩිදියුණු කිරීම් සහ දැනුම බෙදාගැනීම වැනි දෑ තුළින් ජපානය අපට සැලකිය යුතු සහයෝගයක් ලබා දී ඇති බව ප්රකාශ කළා.
රැස්ව සිටි පිරිස අමතමින්, ශ්රී ලංකාවේ ජපන් තානාපති අතිගරු Akio Isomata මහතා, දෙරට අතර ගැඹුරින් මුල් බැසගත් ද්විපාර්ශ්වික සබඳතා ඉස්මතු කළ අතර, ඉන්දියානු සාගරයේ මැද කේන්ද්රස්ථානයක් ලෙස කලාපීය ස්ථාවරත්වය සඳහා ශ්රී ලංකාවේ කැපවීම අවධාරණය කෙරුණා.
මෙම උත්සවයට, ‘Kagami Biraki’ හෙවත් සාම්ප්රදායික සකේ බැරල් විවෘත කිරීමේ අවස්ථාවක් සහ සමුරායිවරුන්ගේ සම්භාව්ය කඩු හරඹයන්ගේ ආභාසයෙන් පෝෂණය වූ නවීන ජපන් සටන් කලාවක් වන ‘Kendo’ කඩු හරඹ නිරූපණයක් ඇතුළත්.
මෙම අවස්ථාවට යුද හා නාවික හමුදාපතිවරුන්, ආරක්ෂක අමාත්යාංශයේ අතිරේක ලේකම් – ආරක්ෂක, රාජ්ය තාන්ත්රික සාමාජිකයින් සහ ජ්යෙෂ්ඨ නිලධාරීන් ඇතුළු ඉහළ පෙළේ නිලධාරීන් සහ සම්භාවනීය අමුත්තන් රැසක් සහභාගී වුණා.
