එක්සත් ජාතීන්ගේ දේශගුණික විපර්යාස සමුළුව ලබන නොවැම්බර් 30 වැනිදා සිට දෙසැම්බර් 12 දක්වා ඩුබායි හිදී පැවැත්වෙනවා.
එහි ඉහළ පෙළේ රාජ්‍ය නායක සමුළුව දෙසැම්බර් 01 සහ 02 දිනවල පැවැත්වීමට නියමිතයි.
මෙම සමුළුව සඳහා ජනාධිපති රනිල් වික්‍රමසිංහ සමඟ විදේශ අමාත්‍ය අලි සබ්‍රි, විදුලි බල හා බලශක්ති ඇමති කංචන විජේසේකර, පරිසර ඇමති කෙහෙළිය රඹුක්වැල්ල යන අමාත්‍යවරුන් එක්වන බවයි වාර්තා වන්නේ.
ඊට අමතරව දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජේවර්ධන, ජනාධිපතිවරයාගේ ජාත්‍යන්තර සබඳතා පිළිබඳ අධ්‍යක්ෂ දිනුක් කොළඹගේ සහ පාර්ලිමේන්තු මන්ත්‍රීවරු සිව්දෙනෙකු ද මෙම නියෝජිත පිරිසට ඇතුළත්.
මේ පිරිස හැරුණු විට තරුණ නායකයින් යැයි පැවසෙන පිරිසක් ඇතුළුව තවත් 70කට ආසන්න පිරිසක් අදාළ සමුළුව සඳහා එක් වීමට සූදානමින් සිටින බවයි වාර්තා වන්නේ.
මේ අතර මෙම අතිවිශාල නියෝජිත පිරිසක් සමඟ අදාළ දේශගුණික සමුළුවට සහභාගී වීම සම්බන්ධයෙන් සමාජ මාධ්‍ය ඔස්සේ සහ ප්‍රධාන ධාරාවේ මාධ්‍ය ඔස්සේ විවිධ වාර්තා පළවීමත් සමඟ අදාළ සංචාරය සඳහා වෙන්ව ඇති මූල්‍ය ප්‍රතිපාදන පිළිබඳ බොහෝ දෙනා ප්‍රශ්න කරනවා.
මේ සම්බන්ධයෙන් දසත නිවුස් කළ විමසීමක දී ආණ්ඩුවට සමීප පාර්ශ්වයක් පැවසුවේ නිල දූත පිරිස හැරුණු විට සමුළුව සඳහා එක්වන සෙසු පිරිස තමන්ගේ පෞද්ගලික වියදමෙන් සහභාගීවන බව තමන් විශ්වාස කරන බවයි.
