ජනාධිපතිවරයාගේ නිල කාලය අවසන් වන දින වකවානු සම්බන්ධයෙන් ශ්‍රේෂ්ඨාධිකරණය විසින් අර්ථ නිරූපණයක් ලබාදෙන තුරු දැනට සැලසුම් කර තිබෙන පරිදි ජනාධිපතිවරණය පැවැත්වීම වැළැක්වීමේ නියෝගයක් නිකුත් කරන ලෙස ඉල්ලා ව්‍යවසායකයෙකු වූ සී.ඩී.ලෙනව විසින් ඉදිරිපත් කළ මූලික අයිතිවාසිකම් පෙත්සම සලකා බැලීම සඳහා පංච පුද්ගල ශ්‍රේෂ්ඨාධිකරණ විනිසුරු මඩුල්ලක් නම් කර තිබෙනවා.
එම විනිසුරු මඩුල්ල ඉදිරියේ අදාළ පෙත්සම මේ මස 08 වනදා සලකා බැලීමට නියමිතයි.
කෙසේවෙතත් මෙම මූලික අයිතිවාසිකම් පෙත්සම සම්බන්ධයෙන් ජනාධිපති රනිල් වික්‍රමසිංහගේ ස්ථාවරත්වය සම්බන්ධයෙන් ද ඊයේ (04) දිනයේ දී ජනාධිපති මාධ්‍ය අංශය විශේෂ නිවේදනයක් නිකුත් කළා.
එහිදී ජනාධිපතිවරයා සඳහන් කර ඇත්තේ; මෙම පෙත්සම්කාර පාර්ශ්වය කිසිදු අයුරකින් නීති උපදෙස් හෝ නොගෙන මෙම පෙත්සම ඉදිරිපත් කර ඇති බවත්; ජනාධිපතිවරයාගේ ධුර කාලය වසර 06ක් නොව 05ක් බවත් අවබෝධ කරගත යුතු බවයි.
එමෙන්ම මෙම වසරේ දී නියමිත පරිදි ජනාධිපතිවරණයක් පැවැත්වීමට මැතිවරණ කොමිෂන් සභාව විසින් තීරණය කරනු ලැබීම නිවැරදි බව ද ජනාධිපතිවරයා සඳහන් කර තිබෙනවා.
එම පෙත්සම සම්බන්ධයෙනුයි මෙලෙස එළඹෙන 08 වැනි දින සලකා බැලීමට දින ලබා දී ඇත්තේ.
මේ අතර ජනපතිවරණය මේ වසරේ පැවැත්වීමට එරෙහි ව ගොනු කළ පෙත්සමට අතරමැදි පාර්ශ්වයක් ලෙස ජාතික ජන බලවේගයක මැදිහත් වීමට තීරණය කර තිබෙනවා.
ඊට අවසර ඉල්ලමින් ආචාර්ය හරිනි අමරසූරිය, විජිත හේරත් සහ එරංග ගුණසේකර අය විසින් ශ්‍රේෂ්ඨාධිකරණයට ගොනු කරන විශේෂ පෙත්සම ද අද පස්වරුවේ ගොනු කිරීමට නියමිතයි.
