ලංකා T 10 සුපර් ලීග් තරගාවලියේ දී තරග පාවාදීමේ සිද්ධියක් සම්බන්ධයෙන් අත්අඩංගුවට ගෙන සිටින ගෝල් මාවල්ස් කණ්ඩායමේ හිමිකරු ලබන 18 වනදා දක්වා රක්ෂිත බන්ධනාගාර ගත කර තිබෙනවා.
සැකකරු අද (16) දින කොළඹ ප්‍රධාන මහේස්ත්‍රාත් තිලිණ ගමගේ මහතා හමුව ඉදිරිපත් කිරීමෙන් අනතුරු මෙම නියෝගය නිකුත් කළා.
අදාළ සැකකරු අද (16) ප්‍රධාන මහේස්ත්‍රාත්වරයාගේ නිල මැදිරිය වෙත ඉදිරිපත් කිරීමෙන් පසු මෙම සිද්ධිය සම්බන්ධයෙන් රහස් ප්‍රකාශයක් ලබාදීමට එකඟ බව ප්‍රකාශ කර තිබෙනවා.
ඒ, අනුව අදාළ රහස් ප්‍රකාශය සටහන් කරගැනීම සඳහා සැකකරුව ලබන 18 වනදා අධිකරණයට ඉදිරිපත් කරන ලෙස ප්‍රධාන මහේස්ත්‍රාත්වරයා නියෝග කළා.
ගෝල් මාවල්ස් කණ්ඩායමට ක්‍රීඩා කළ බටහිර ඉන්දීය කොදෙව් ක්‍රීඩක ඇන්ඩ්රි ෆ්ලෙචර්ට තරග පාවාදීම සඳහා යෝජනා කළේ යැයි සැකපිට මෙම ඉන්දීය ජාතික ප්‍රේම් තක්කර් නමැත්තා ක්‍රීඩා දූෂණ වැළැක්වීමේ පොලිස් විමර්ශන ඒකකය මගින් පසුගිය දා අත්අඩංගුවට ගැනුණා.
