උතුරු තමිල්නාඩුව දෙසට මේ වනවිට ගමන් කරමින් සිටින ‘මිජවුම්’ සුළි කුණාටුව හේතුවෙන් අද (04) දිනයේ සිට දින තුනක් රජයේ නිවාඩු දිනයක් ලෙස ප්‍රකාශයට පත් කිරීමට තමිල්නාඩු ප්‍රාන්ත රජයේ තීරණය කර තිබෙනවා.
මේ සමඟ ප්‍රාන්තය තුළ දුම්රිය ගමන් සේවා රැසක් ද නවතා දමා ඇති බවයි ඉන්දීය මාධ්‍ය වාර්තා කරන්නේ.
පුද්ගලික සමාගම් ද සිය සේවකයින්ට දැනුම් දී ඇත්තේ නිවසේ සිට රාජකාරී කටයුතුවල නිරත වන ලෙසටයි.
මේ අතර පවතින අධික වර්ෂාවත් සමඟ චෙන්නායි ගුවන් තොටුපොළ ද ජලයෙන් යට වී ඇති ආකාරය ඉන්දීය මධ්‍ය අද (04) උදෑසන වාර්තා කර තිබුණා.
මේ හේතුවෙන් චෙන්නායි ගුවන් තොටුපොළේ ගුවන් ගමන් රැසක් අවලංගු කර ඇති බව ගුවන්තොටුපොළ බලධාරීන් දැනුම් දෙනවා.
චෙන්නායි හි බොහෝ ප්‍රදේශ ජලයෙන් යට වී ඇති අතර, පහත් බිම් ප්‍රදේශ දැඩි ලෙස ජලයෙන් යට වී ඇති බවයි වාර්තා වන්නේ.
ඇඳ හැලුණු අධික වර්ෂාවෙන් විපතට පත් වූවන්ට සහන සැලසීම සඳහා වෙරළබඩ දිස්ත්‍රික්කවල සහන මධ්‍යස්ථාන 5,000 කට ආසන්න ප්‍රමාණයක් බලධාරීන් විසින් මේ වනවිටත් පිහිටුවා තිබෙනවා.
‘මිජවුම්’ සුළි කුණාටුව හෙට (05) දහවල් නෙල්ලෝර් සහ මචිලිපට්නම් අතර ගොඩබිමට කඩා වැදීමට නියමිත බවයි ඉන්දීය කාලගුණ අංශ අනතුරු අඟවා ඇත්තේ.
