ගොඩගම ජල නළයේ අලුත්වැඩියාව අවසන් – අද මධ්‍යහන වන විට ජල සැපයුම යථාතත්ත්වයට (ඡායාරූප/වීඩියෝ)

ලබුගම කලටුවාව ජල පවිත්‍රාගාරයේ සිට මහරගම දක්වා ජලය රැගෙන යන නළයේ අලුත්වැඩියා කටයුතු මේ වනවිට අවසන් කර තිබෙනවා.

ජාතික ජල සම්පාදන හා ජලාපවහන මණ්ඩලයේ සහකාර සාමාන්‍ය අධිකාරී කුමුදු විජය ගුණවර්ධනගෙන් අප කළ විමසීමක දී සඳහන් කළේ අද (18) අලුයම 4.00 පමණ වනවිට එහි අලුත්වැඩියා කිරීමේ කටයුතු අවසන් කළ බවයි.

ඒ, අනුව අද (18) මධ්‍යහන වන විට 80%ක පමණ ප්‍රදේශයකට ජල සැපයුම යථාතත්ත්වයට පත්කළ හැකි බවයි සහකාර සාමාන්‍ය අධිකාරීවරයා පැවසුවේ.

එමෙන්ම උස් බිම්වල පිහිටි නිවාස වෙත අද (18) පස්වරුව වනවිට ජල සැපයුම යථාතත්ත්වයට පත්වනු ඇති බවයි ඔහු වැඩිදුරටත් සඳහන් කළේ.

හයිලෙවල් මාර්ගයේ ගොඩගම ප්‍රදේශයේදී ඊයේ (17) අලුයම් කාලයේ දී මෝටර් රථයක් ජල නළයේ ගැටීමෙන් නළය පුපුරා ගොස් තිබුණා.

මේ හේතුවෙන් ප්‍රදේශ ගණනාවකට ජල සැපයුම අඩාල වුණා.

ගොඩගම, හෝමාගම, පන්නිපිටිය, රුක්මල්ගම, පැලැන්වත්ත, මත්තෙගොඩ යන ප්‍රදේශ මෙලෙස ජල සැපයුමට බාධා එල්ල වී ඇති ප්‍රදේශයි.