පුත්තලම – පාලවිය ගුවන් හමුදා කඳවුරේ සේවයට පැමිණෙමින් සිටි ගුවන් සෙබළියක් ඊයේ (07) දින පැහැරගෙන ගොස් තිබුණා.
ඇය පුත්තලම පාලවිය ගුවන් හමුදා කඳවුරට අනුයුක්තව රාජකාරියේ යෙදී සිටි වයස අවුරුදු 27 ක් වන ගුවන් සෙබළියක්
සිය යතුරුපැදියෙන් ඊයේ (07) දින රාජකාරිය සඳහා කඳවුර බලා එමින් සිටිය දී මෙසේ පැහැර ගැනීමට ලක්ව තිබුණා.
පැහැර ගැනීම සිදුකර ඇත්තේ, චීන වරාය ගුවන් හමුදා කඳවුරට අනුයුක්තව රාජකාරියේ නිරතව සිටි වරකාපොළ ප්‍රදේශයේ පදිංචිකාර සෙබළෙක් සහ ඔහුගේ පියා බවයි වාර්තා වන්නේ.
සෙබළා සහ ඔහුගේ පියා යන දෙපළ විසින් එකවරම මෝටර් රථයකින් පැමිණ මාර්ගය හරස් කොට සෙබළියගේ මුහුණට ලේන්සුවක් වැනි යමක් තබා සිර කර ඇයව සිහිමුර්ජා කර පැහැර ගෙන එම ප්‍රදේශයේ පාලු නිවසකට රැගෙන විත් තිබෙනවා.
ගුවන් සෙබළියගේ සැමියා විසින් පොලිසියට කරන ලද පැමිණිල්ලකට අනුව මෙම සිද්ධියට සම්බන්ධ පිය පුතු දෙපළ අත්අඩංගුවට ගැණුනා.
පසුව පොලිසිය ඔවුන්ගෙන් කළ මූලික ප්‍රශ්ණ කිරීම් වලදී අනාවරණය වී ඇත්තේ ගුවන් සෙබළා සහ පැහැර ගැනීමට ලක් වූ සෙබළිය අතර කාලයක් පුරා ප්‍රේම සම්බන්ධයක් ඇතිව තිබූ බවයි.
පසුව අත්අඩංගුවට ගත් පිය පුතු දෙපළ පුත්තලම මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුව කරුණු සලකා බැලූ මහේස්ත්‍රාත්වරිය දෙදනාටම ඇප නියම කළ ද ඇප තැබීම සඳහා කිසිවකු ඉදිරිපත් නොවීම හේතුවෙන් රක්ෂිත බන්ධනාගාර ගත කිරීමට නියෝග කර තිබුණා.
