ගැටුමකට එළිය දෙන්න බෑ කියූ වෑන් රියදුරාට පහරදීමක්

ගාල්ල මාපලගම ප්‍රදේශයේදී වෑන් රථ රියදුරෙකුට පහරදීම සම්බන්ධයෙන් අත්අඩංගුවට ගත් පුද්ගලයන් 3 දෙනෙකු රක්ෂිත බන්ධනාගාර ගතකර තිබෙනවා.

සැකකරුවන් උඩුගම මහේස්ත්‍රාත් අධිකරණය වෙත ඉදිරිපත් කෙරුණු අතර එහිදී මහේස්ත්‍රාත්වරයා නියෝග කළේ සැකකරුවන් ලබන 24 දින දක්වා රක්ෂිත බන්ධනාගාර ගත කරන ලෙසටයි.

යටලමත්ත ප්‍රදේශයේ සිට මාපලගමට පැමිණෙමින් සිටියදී යි සැකකරුවන් වෑන් රථය නවතා රියදුරාට පහර දී ඇති අතර
පහරකෑමට ලක්වූ මාපලගම ප්‍රදේශයේ පදිංචි මෙම පුද්ගලයා රෝහල් ගත කර තිබෙනවා.

පසුගිය 15 වනදා දහවල් කාලයේ මාපලගම ප්‍රදේශයේ පිරිසක් යටලමත්ත ප්‍රදේශයේ පිහිටි සුබසාධන කටයුත්තක් සඳහා ප්‍රවාහනය කර එදින රාත්‍රී කාලයේ නැවතත් මාපලගම ප්‍රදේශයට පැමිණෙමින් සිටියදී වෑන් රථයේ රියදුරුට මාපලගම කොළඹ කඩේ ප්‍රදේශයේ දී වාහනය නවතා මෙලෙස පහරදී ඇතැයි සඳහන්.

පහරකෑමට ලක් වූ පුද්ගලයා ප්‍රදේශවාසීන් විසින් නැවත හරවා යවා ඇති අතර පහර දුන් පුද්ගලයන් වෑන් රථය පසුපස ත්‍රී රෝද රථයකින් හඹා ගොස් යළිත් පොලු මුගුරුවලින් පහර දී තිබෙනවා.

පහරකෑමට ලක් වූ පුද්ගලයා පොලිස් හදිසි ඇමතුම් අංශයට කළ දැනුම්දීමකට අනුව නාගොඩ පොලිසියේ නිලධාරීන් කණ්ඩායමක් පැමිණ පහර දුන් පිරිස හඳුනාගෙන ඇති අතර සැකකරුවන් පළා ගොස් තිබුණා.

පසුදින (16) පහරකෑමට ලක්වු පුද්ගලයා කරන ලද පැමිණිල්ලක් අනුව පසුව සැකකරුවන් අත්අඩංගුවට ගෙන තිබෙනවා.

ඔවුන්ගෙන් කළ ප්‍රශ්න කිරීම්වලදී හෙළි වී ඇත්තේ දෙපිරිසක් අතර ගැටුමක් සිදුව ඇති අතර එම අවස්ථාවේ එක් පාර්ශවයක් විසින් වෑන් රථය වාහනය නවත්වා අනෙක් පාර්ශවයට පහර දෙන තෙක් විදුලි ආලෝකය ලබාදෙන ලෙසට කළ ඉල්ලීම ප්‍රතික්ෂේප කිරීම හේතුවෙන් රියදුරාට පහර දී ඇති බවයි.

පහර කෑමට ලක් වූ වෑන් රථයේ රියදුරු උඩුගම මහ රෝහලට ඇතුලත් කර ඇති අතර පහරදීම සිදු කළ මාපලගම ප්‍රදේශයේ පදිංචි වයස අවුරුදු 35, 28 යන වයස්වල සැකකරුවන් තුන්දෙනා මත්ද්‍රව්‍ය භාවිතා කර ප්‍රදේශයේ ජනතාවට පීඩාකාරී ලෙස හැසිරෙන පිරිසක් බවට ද හඳුනාගෙන ඇති බවයි.

සිද්ධියට අදාළ ඉදිරි විමර්ශන නාගොඩ පොලිස් ස්ථානය මගින් සිදුකරනු ලබනවා.