ගාසා තීරයේ සෞඛ්‍ය පද්ධතිය අවදානමේ – ලෝක සෞඛ්‍ය සංවිධානයෙන් අනතුරු ඇඟවීමක්

ගාසා තීරයේ සෞඛ්‍ය පද්ධතිය ‘බිඳී යන තැනකට’ පැමිණ ඇති බව ලෝක සෞඛ්‍ය සංවිධානය අනතුරු අඟවනවා.

මානුෂීය ව්‍යසනයක් වැලැක්වීමට සුළු කාලයක් ඉතිරිව ඇති බවයි එම සංවිධානය සඳහන් කරන්නේ.

ඊශ්‍රායලය විසින් මිලියන 1.1ක ජනතාවකට පැය 24ක් ඇතුළත දකුණු ගාසා තීරයට සංක්‍රමණය වන ලෙස මේ එනවිට නියෝග කර තිබෙනවා.

ඒ, අනුව දහස් ගණනක් පිරිස් වාහනවලින් හෝ පයින් පලා යමින් සිටින බවයි විදෙස් මාධ්‍ය වාර්තා කළේ.

එක්සත් ජාතීන්ගේ සංවිධානයේ ප්‍රධානී ඇන්ටෝනියෝ ගුටරෙස් පැවසුවේ මෙම මහා පරිමාණ ඉවත් කිරීම සඳහාවන ඉල්ලීම අතිශයින් අනතුරුදායක බවයි.

මේ අතර තමන් අපේක්ෂිත ගොඩබිම් ප්‍රහාරයට පෙර ගාසා තීරයේ වැටලීම් කිහිපයක් දැනටමත් දියත් කර ඇති බව ඊශ්‍රායල හමුදාව පවසන්නේ.

ත්‍රස්තවාදීන් සහ ආයුධවලින් ප්‍රදේශය පිරිසිදු කිරීම සහ හමාස් විසින් රඳවාගෙන සිටින ප්‍රාණ ඇපකරුවන් සොයාගැනීම මෙහි අරමුණ බවයි ඊශ්‍රායල හමුදා ප්‍රකාශකයෙකු පැවසුවේ.

මේ අතර එක්සත් ජනපදය ඊශ්‍රායලයෙන් ඉල්ලා සිටියේ සිවිල් වැසියන් ඝාතනය නොකිරීමට සෑම පියවරක්ම ගන්නා ලෙසයි.

එක්සත් ජනපද රාජ්‍ය ලේකම් ඇන්ටනි බ්ලින්කන් පැවසුවේ ගාසා තීරයේ ‘ආරක්ෂිත ප්‍රදේශ’ සුරක්ෂිත කිරීම සඳහා ඊශ්‍රායලය සමඟ කටයුතු කරන බවයි.

පසුගිය සති අන්තයේ හමාස් සටන්කාමීන් දේශසීමා හරහා සිවිල් වැසියන්ට සහ සොල්දාදුවන්ට පහර දීමෙන් ඊශ්‍රායලයේ 1,300 කට වැඩි පිරිසක් ජීවිතක්ෂයට පත් වුණා.

ඊට ප්‍රතිප්‍රහාර වශයෙන් ඊශ‍්‍රායලය විසින් ගාසා තීරයට දියත් කරන ලද බෝම්බ ප‍්‍රහාරවලින් පුද්ගලයන් 2,000කට ආසන්න පිරිසක් මිය ගිය බව පලස්තීන බලධාරීන් පවසනවා.

හමාස්ගේ ප්‍රහාරයෙන් පසුව, ඊශ්‍රායල අගමැති බෙන්ජමින් නෙතන්යාහු ගාසා තීරය “පාළු දූපතක්” බවට පත් කරන බවට තර්ජනය කර ඇති අතර, එහි වැසියන්ට “දැන් ඉවත්ව යන ලෙස” අනතුරු ඇඟවනු ලැබුවා.