ගම්පොළ බසයක් තුළ දී පුද්ගලයෙකු පැහැරගත් පිරිස අල්ලයි – පෞරාණික කඩුවත් පොලිස් භාරයේ (ඡායාරූප)

පසුගිය 24 වනදා අලුයම් කාලයේ දී බස් රථයක ගමන් කරමින් සිටි පුද්ගලයෙකුට ගම්පොළ, ජයමාලපුර ප්‍රදේශයේ දී පහර දී වෑන් රථයකින් පැහැරගෙන යාමේ සිද්ධියට සම්බන්ධ සැකකරුවන් අත්අඩංගුවට ගෙන තිබෙනවා.

සැකකරුවන් 05 දෙනෙක් කොළඹ ප්‍රදේශයේ දී මෙලෙස අත්අඩංගුවට ගෙන ඇති අතර, මෙම පැහැරගැනීමට ඔවුන් පැමිණි වෑන් රථය සහ පැහැරගැනීමේ සිද්ධියට මුල් වී ඇති පෞරාණික යැයි සැකකරන කඩුවක් ද පොලිස් භාරයට ගෙන ඇති බවයි වාර්තා වුණේ.

අත්අඩංගුවට ගැනුණු සැකකරුවන් මේ වනවිට ගම්පොළ පොලිස් ස්ථානය වෙත රැගෙනවිත් ඇති බවයි අප වාර්තාකරු පැවසුවේ.

මෙලෙස අත්අඩංගුවට ගැනුණු පිරිස අතර කාන්තාවක් ද වන බවයි වාර්තා වුණේ.

මාවෙල සිට මහනුවර දක්වා ධාවනය වූ ලංගම බස් රථයක් ජයමාලපුර ප්‍රදේශයේදී වෑන් රථයක් හරස්ර නවත්වා බසයට ගොඩ වූ පිරිසක් එම බස් රථයේ ගමන් කරමින් සිටි හේමන්ත රාජපක්ෂ නැමැති පුද්ගලයෙක් පසුගිය 24 වනදා පැහැරගෙන ගොස් තිබුණා.

මෙලෙස පැහැරගත් පුද්ගලයා කොළඹ – ඔරුගොඩවත්ත ප්‍රදේශයට රැගෙන ගොස් පහර දී, එහිදී ඔහු විසින් අලෙවි කර තිබූ කඩුවක් සම්බන්ධයෙන් තොරතුරු විමසා එය අලෙවිකර පුද්ගලයාගෙන් එය ලබා ගැනීමට අදාළ පිරිස කටයුතු කර තිබුණා.

ඒ, අතරවාරයේ පහර ගැනීමට ලක්වූ පුද්ගලයා ඔවුන්ගෙන් මිදී ගම්පොළ ප්‍රදේශයට පැමිණ සිද්ධිය පිළිබඳව ගම්පොළ පොලීසියට පැමිණිලිකර තිබූ බවයි ඊයේ (25) වාර්තා වුණේ.

අනතුරුව විමර්ශන සිදුකළ පොලිසිය සිද්ධියට සම්බන්ධ කොළඹ ප්‍රදේශයේ විවිධ ස්ථානවල සිටි සැකකරුවන් අත්අඩංගුවට ගැනීමට කටයුතු කර තිබුණා.

එලෙස අත්අඩංගුවට ගැනුණු සැකකරුවන් අද (26) දිනයේ දී ගම්පොළ මහේස්ත්‍රාත් අධිකරණය වෙත ඉදිරිපත් කිරීමට නියමිතයි.

සැකකරුවන් සන්තකයේ තිබී සොයාගත් කඩුව පෞරාණික වටිනාකමක් තිබේ ද යන්න සොයා බැලීමට පුරාවිද්‍යා දෙපාර්තමේන්තුව වෙත භාරදීමට පියවර ගන්නා බව පොලිසිය පැවසුවා.