සංවිධානාත්මක අපරාධකරුවෙකු වන ගනේමුල්ලේ සංජීව නමැත්තා කොළඹ අලුත්කඩේ අධිකරණ සංකිර්ණයේ දී ඝාතනයට යොදාගත් ගිනිඅවිය කඩුවෙල නවාතැන්පොළක දී සැකකාර කාන්තාව තමාට භාරදුන් බව අත්අඩංගුවේ පසුවන වෙඩි තැබූ පුද්ගලයා පොලිසියට පවසා තිබෙනවා.
පොලිස් මාධ්ය ප්රකාශක ජ්යෙෂ්ඨ පොලිස් අධිකාරි බුද්ධික මනතුංග මහතා සඳහන් කළේ, සැකකරු එහිදී ගිනිඅවිය පරීක්ෂා කර බලා ඇති බවයි.
ඝාතනයට පෙර දින අදාළ කාන්තාව සහ අත්අඩංගුවට ගත් සැකකරු කඩුවෙල නවාතැන්පොලේ නැවතී සිට ඇති බවට ද තොරතුරු වාර්තා ලැබී ඇති බව පොලිස් මාධ්ය ප්රකාශකවරයා පැවසුවා.
ගනේමුල්ල සංජීව ඝාතනය කර පෙරේදා (19) පස්වරුවේ කුලී රථයක නැගී නුගේගොඩට ගොස් ප්රසිද්ධ රෙදිපිළි වෙළෙඳසැලකින් ඔවුන් දෙදෙනා ඇඳුම් ද මිල දී ගෙන තිබෙනවා.
පලා ගොස් ඇති කාන්තාව නුගේගොඩට පැමිණ සැකකරු මුණගැසී දෙදෙනාම අධිවේගී මාර්ගය ඔස්සේ මීගමුවට ගොස් ඇත්තේ ද කුලී රථයකින්.
පසුව ඝාතන සැකකරු වෑන් රථයකට නැග කල්පිටියට යමින් සිට ඇත්තේ ඉන්දියාවට පලායාමේ අභිප්රායෙන් බව පරීක්ෂණවල දී හෙළි වී තිබෙනවා.
සැකකාර කාන්තාව මීගමුවේ සිට ත්රිරෝද රථයේ නැගී පලා ගොස් ඇති බව දැනට කළ විමර්ශනවල දී අනාවරණ වී ඇති අතර ඝාතනයට දින කිහිපයකට පෙර අදාළ කාන්තාව සහ සැකකරු දිවුලපිටිය හා මීගමුව ප්රදේශයේ ළැඟුම්හල් දෙකක නවාතැන් ගෙන ඇති බවට ද තොරතුරු අනාවරණ වී තිබෙනවා.
පොලිසිය සඳහන් කළේ, රුපියල් ලක්ෂ 150ක කොන්ත්රාත්තුවක් මත ගනේමුල්ලේ සංජිව නමැත්තා ඝාතනය කළ බවත් ඉන් රුපියල් ලක්ෂ 02ක මුදලක් ගිණුමට බැර වී ඇති බවත් සැකකරු පවසා ඇති බවයි.
ඉතිරි මුදල් ඉන්දියාවේ දී ලබාදීමට එකඟ වී තිබෙනවා.
පලාගිය කාන්තාව අත්අඩංගුවට ගැනීමට කොළඹ අපරාධ කොට්ඨාසය විමර්ශන සිදු කරමින් සිටිනවා.
ගනේමුල්ලේ සංජීව නමැත්තා පෙරේදා කොළඹ, අලුත්කඩේ අංක 05 අධිකරණයේ විත්ති කුඩුවේ දී වෙඩි තබා ඝාතනය කෙරුණු අතර ඔහු සමග නීතිඥ වෙස් ගත් කාන්තාවක් ද එදින පැමිණ සිටියා.
නමුත් ඇය මෙතෙක් අත් අඩංගුවට ගැනීමට හැකි වී නැහැ.
