ඉන්දියාවේ ප්‍රථම මානව අභ්‍යවකාශ ගමන සඳහා 38 හැවිරිදි ගෲප් කපිතාන් ශුභාන්ෂු ශුක්ලා තෝරා ගෙන තිබෙනවා.
ඉන්දියා – එක්සත් ජනපද ඒකාබද්ධ වැඩපිළිවෙළක් වන Axiom-4 මෙහෙයුම සඳහා ජාත්‍යන්තර අභ්‍යවකාශ මධ්‍යස්ථානය (ISS) වෙත පියාසර කරන ප්‍රධාන ගගනගාමියා ලෙස ශුක්ලා තෝරා ගත් බව ඉන්දියානු අභ්‍යවකාශ පර්යේෂණ සංවිධානය (ISRO) තහවුරු කළා.
මේ සඳහා සිව්දෙනෙක් තෝරා ගෙන සිටි අතර ඔවුන් ගගන්යාත්‍රී නම් අන්වර්ථ නමකින් මේ දක්වා හඳුන්වනු ලැබුවේ නිශ්චිතවම අභ්‍යාවකාශයට යන්නේ කවුදැයි හෙළි නොකරමින්.
ගගනගාමීන් හතර දෙනෙක්, ඉන්දියානු ගුවන් හමුදාවේ ගෲප් කපිතාන්වරුන් වන ප්‍රශාන්ත් බාලක්‍රිෂ්ණන් නායර්, අජිත් ක්‍රිෂ්ණන් සහ අංගද් ප්‍රතාප්, සහ ශුභාන්ෂු ශුක්ලා ගගන්යාන් මෙහෙයුම සඳහා පසුගිය වසර පහක කාලය තුළ රුසියානු සහ ඉන්දියානු පහසුකම්වල පුළුල් ලෙස පුහුණුව ලබමින් සිටිනවා.
ශුක්ලාට අමතරව එම මෙහෙයමුට ඇමෙරිකා, පෝලන්ත සහ හංගේරියා ජාතිකයන් තිදෙනෙක් ඇතුළත්.
ISRO පැවසුවේ Axiom-4 මෙහෙයුම සඳහා නම් කරන ලද ගගනගාමීන් අගෝස්තු මුල් සතියේ පුහුණුවීම් ආරම්භ කරන බවයි.
“මෙම මෙහෙයුමේදී ලබාගත් අත්දැකීම් ඉන්දියාවේ මානව අභ්‍යවකාශ වැඩසටහනට ප්‍රයෝජනවත් වනු ඇති අතර, ISRO සහ NASA අතර මානව අභ්‍යවකාශ පියාසර සහයෝගීතාව ශක්තිමත් කරනු ඇත,” ISRO නිවේදනයේ වැඩිදුරටත් සඳහන්.
