ඉන්දියානු වේල්ලක වාන් දොරටු විවෘත කිරීම නිසා ඇති වූ බව කියන හදිසි ගංවතුර සම්බන්ධයෙන් බංග්ලාදේශය තුළ විවේචනවලට මුහුණ දුන් ඉන්දියාව, එම ප්රකාශයන් ප්රතික්ෂේප කළ අතර, ගංවතුරට හේතු වී ඇත්තේ ජල පෝෂක ප්රදේශවලට අනවරත වර්ෂාපතනයක් ලැබීම බව ඉන්දියාව පවසනවා.
බංග්ලාදේශයේ තොරතුරු සහ විකාශන උපදේශක නහිඩ් ඉස්ලාම් චෝදනා කළේ, ඉන්දියාව කිසිදු පූර්ව අනතුරු ඇඟවීමකින් තොරව වාන් දොරටු විවෘත කළ බවයි.
බංග්ලාදේශ විරෝධතා ව්යාපාරයේ ප්රමුඛ ශිෂ්ය නායකයෙකු වන ඉස්ලාම්, සිය “ජන විරෝධී ප්රතිපත්තිය” නතර කරන ලෙස ඉන්දියාවෙන් ඉල්ලා සිටියා.
බංග්ලාදේශයේ ජනතාව සහ සිසුන් “ඉන්දියාවේ මෙම ප්රතිපත්තිය සමඟ කෝපයෙන් සිටින” බවත් ඔහු පවසා තිබෙනවා.
බංග්ලාදේශයේ දිස්ත්රික්ක 08කට ගංවතුර හේතුවෙන් මිලියන තුනකට අධික ජනතාවක් පීඩාවට පත්ව ඇති අතර අවම වශයෙන් පුද්ගලයින් දෙදෙනෙකු මිය ගොස් තිබෙනවා.
බංග්ලාදේශ මාධ්ය වාර්තා කළේ ත්රිපුරයේ දුම්බුර් වේල්ලේ වාන් දොරටු විවෘත කිරීම නිසා ගංවතුර ඇති වූ බවයි.
නමුත් ඉන්දියාවේ විදේශ කටයුතු අමාත්යාංශය (MEA) “බංග්ලාදේශයේ ප්රකාශ කරන කනස්සල්ල” පිළිගෙන ඇති අතර, දුම්බුර් වේල්ල විවෘත කිරීම නිසා ගංවතුර ඇති වූ බව පැවසීම “නිවැරදි නොවේ”, යැයි දීර්ඝ ප්රකාශයක් නිකුත් කරමින් කියා සිටියා.
ඉන්දියාව සහ බංග්ලාදේශය යන දෙරටටම විහිදෙන Gumti ගඟේ ජල පෝෂක ප්රදේශ “පසුගිය දින කිහිපය තුළ මේ වසරේ අධිකම වර්ෂාපතනය අත්විඳින ලද” බව එය පැහැදිලි කළා.
“බංග්ලාදේශයේ ගංවතුර ඇතිවීමට මූලික වශයෙන් හේතු වී ඇත්තේ වේල්ලට පහළින් ඇති මෙම විශාල ජල පෝෂක ප්රදේශවල ජලයයි” යනුවෙන් එම ප්රකාශයේ වැඩිදුරටත් සඳහන් වනවා.
