ලොව ධනවත් ව්‍යාපාරිකයෙකු ලෙස සැලකෙන ගෞතම් අදානිගේ සමූහ ව්‍යාපාරයෙන් මෙරට වරාය ව්‍යාපෘතියකට අරමුදල් සැපයීමට සිය සම්පත් පමණක් භාවිත කිරීමට අදානි තීරණය කර තිබෙනවා.
ඔහුගේ අත්සනින් යුතු ව නිකුත් කළ නිවේදනයේ දැක්වෙන්නේ සිය ව්‍යාපෘති සඳහා අමෙරිකානු රජයේ මූල්‍ය ප්‍රදාන ලබා නොගන්නා බවයි.
ඊයේ (10) මෙම නිවේදනය නිකුත් කර ඇති අතර Adani Ports and SEZ Ltd පවසා ඇත්තේ අදාළ ව්‍යාපෘතිය ලබන වසර මුල දී ආරම්භ කිරීමට නියමිත බවයි.
සිය සමාගම එහි ප්‍රාග්ධන කළමනාකරණ උපාය මාර්ගයට අනුකූලව “අභ්‍යන්තර උපචිත” හරහා ක්‍රියාත්මක ව්‍යාපෘතියට අරමුදල් සපයන බවත් 2023 වසරේ දී “එක්සත් ජනපද ජාත්‍යන්තර සංවර්ධන මූල්‍ය සංස්ථාවෙන් (DFC) මූල්‍යකරණය සඳහා වූ ඉල්ලීම” කළ බවත් පසුව එය ඉන් ඉවත් කර ගත් බවයි.
කොළඹ වරායේ බටහිර පර්යන්තය (CWIT) නමින් හැඳින්වෙන ගැඹුරු ජල බහාලුම් පර්යන්තයක් සංවර්ධනය කිරීම, ඉදිකිරීම සහ ක්‍රියාත්මක කිරීම සඳහා ආධාර කිරීම සඳහා එක්සත් ජනපද ජාත්‍යන්තර සංවර්ධන මූල්‍ය සංස්ථාව පසුගිය වසරේ නොවැම්බර් මාසයේ දී ඩොලර් මිලියන 553 ක ණයක් ලබා දීමට එකඟ වී තිබුණා.
CWIT සංවර්ධනය කරනු ලබන්නේ Adani Ports, John Keells Holdings Plc සහ Sri Lanka Port Authority (SLPA) හි එකමුතුවක් විසින්.
දකුණු ආසියානු කලාපය තුළ වර්ධනය වන චීනයේ බලපෑමට ප්‍රතිරෝධයක් ලෙස එක්සත් ජනපද ජාත්‍යන්තර සංවර්ධන මූල්‍ය සංස්ථාවේ මූල්‍යකරණ වැඩසටහනේ කොටසක් වශයෙන් අදානි සමාගමට මෙම අවස්ථාව උදා වී තිබුණු බවයි ඉන්දීය මාධ්‍ය වාර්තා කරන්නේ.
