පුද්ගලයන් 12 දෙනෙකු සමාජ මාධ්‍ය ඔස්සේ ISIS ත්‍රස්ත සංවිධානය ප්‍රවර්ධනය කරමින් ප්‍රකාශ පළ කර එම සංවිධානයේ ලාංඡන සහිත මුදු ළඟ තබාගත් බව කියන සිද්ධියට අදාළව ලිඛිත දේශනයක් සහ රස පරීක්ෂක වාර්තා වහාම අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් පසන් අමරසේන මහතා ත්‍රස්ත විමර්ශන කොට්ඨාසයට නියෝග කළා.
මෙම සිද්ධියට අදාළව ඉදිරිපත් වූ කරුණු සලකා බැලීමෙන් පසුව මහේස්ත්‍රාත්වරයා විසින් මෙම නියෝගය කරනු ලැබුවා.
මෙම සැකකරුවන්ගෙන් පස්දෙනකු ඉන්දියාවේ සිටින අතර, සැකකරුවන් සිව්දෙනකු අත්අඩංගුවට ගෙන ඇති බව ත්‍රස්ත විමර්ශන කොට්ඨාසය අධිකරණයට දැනුම් දුන්නා.
චානී මොහොමඩ් රිස්මන්, මොහොමඩ් පාරුක් සනීකි, මොහොමඩ් අබ්දුල් රාහිත් යන සැකකරුවන් ඉන්දියාවේ දී අත්අඩංගුවට ගෙන තිබුණ ද අබ්දුල් සෙයිනි මවුලනී මේ වන තෙක් අත්අඩංගුවට ගෙන නොමැති බවයි ත්‍රස්ත විමර්ශන කොට්ඨාසය අධිකරණයට දැනුම් දුන්නේ.
ත්‍රස්ත විමර්ශන කොට්ඨාස පනතට මෙම සිද්ධිය අදාළ වන බව විමර්ශන නිලධාරින් අධිකරණයට දන්වා තිබුණා.
සැකකාර පාර්ශ්වයේ පිරිස සඳහන් කරන්නේ මෙම ක්‍රියාවලිය ත්‍රස්ත විමර්ශන කොට්ඨාස පනතට අදාළ නොවන බවයි.
ඒ, අනුව ඉදිරිපත් වූ කරුණු සලකා බැලූ අධිකරණය, සිද්ධියට අදාළව ලිඛිත දේශනයක් සහ රස පරීක්ෂක වාර්තා වහාම අධිකරණයට ඉදිරිපත් කරන ලෙසටත් විමර්ශන කටයුතු තවදුරටත් සිදුකරන ලෙසටත් ත්‍රස්ත විමර්ශන කොට්ඨාසයට නියෝග කරනු ලැබුවා.
