අපරාධ පරීක්ෂණ දෙපාර්තමේන්තුව භාරයේ දින 90 ක රැඳවුම් නියෝග මත රඳවා තබා ප්‍රශ්න කෙරෙන හිටපු අමාත්‍ය සිවනේසතුරෙයි චන්ද්‍රකාන්ත් හෙවත් පිල්ලෙයාන් කුරිරු එල්ටීටීඊ ත්‍රස්තවාදයෙන් මිදී පලාවිත්, ඔවුන්ට එරෙහිව රට වෙනුවෙන් සටන් කිරීම අගය කළ යුතු බවත්, පිල්ලෙයාන් යනු දේශප්‍රේමියෙකු බවත් ඔහුගේ නීතිඥ උදය ගම්මන්පිළ මහතා පවසනවා.
පෙරේදා (14) පස්වරුවේ අපරාධ පරීක්ෂණ දෙපාර්තමේන්තුවේ අවසරය මත පිල්ලෙයාන් සමග සාකච්ඡා කිරීමට ඔහුගේ නීතිඥ ගම්මන්පිළට හැකි වූ අතර අද (16) දින දහවල් මාධ්‍ය හමුවක් කැඳවමින් අදාළ කරුණු සම්බන්ධයෙන් ගම්මන්පිළ මහතා අනාවරණය කරමින් මේ බව කියා සිටියා.
ත්‍රස්තවාදය වැළැක්වීමේ පනත අහෝසි කරන බවට මැතිවරණ සමයේ දී බොරු පොරොන්දු ගණනාවක් දුන් ජනාධිපති ප්‍රමුඛ රජයේ පාර්ශ්වය මේ වනවිට එම පනත උපයෝගී කරගනිමින් අධිකරණය විසින් ගනු ලැබිය යුතු තීන්දු තීරණ ගනිමින් දේශපාලනික පළිගැනීම් හි නිරත වන බවයි ගම්මන්පිළ මහතා චෝදනා කර සිටින්නේ.
තමන්ට පිල්ලෙයාන් සමග සිදු කළ සම්පූර්ණ සාකච්ඡාව නඩු කටයුත්තක් පවතින බැවින් කඩිනමින් මාධ්‍යය වෙත මුදා හැරිය නොහැකි වුව ද, ඉදිරියේ දී පිල්ලෙයාන්ගේ නිදහස වෙනුවෙන් තමන් නඩු ගණනාවක් ඉදිරිපත් කිරීමට සූදානමින් සිටින බව ද නීතිඥ උදය ගම්මන්පිළ මහතා පැවසුවා.
උතුරේ ත්‍රස්තවාදීන්ට එරෙහිව සටන් කරමින් සිටි පිල්ලෙයාන් කොළඹ සිටි නැගෙනහිර විශ්වවිද්‍යාලයේ හිටපු උප කුලපතිවරයෙකුගේ අතුරුදන් වීමක් සම්බන්ධයෙන් තමන් කිසිවක් නොදන්නා බව ද ප්‍රකාශ කළ බවයි උදය ගම්මන්පිළ මහතා වැඩිදුරටත් කියා සිටියේ.
wpDiscuz
