අරගලයෙන් විනාශ කළ දේපොළ සම්බන්ධයෙන් තමන් රජයෙන් ලබාගත් වන්දි මුදල් කිසිසේත් ම සිය නිවස ප්‍රතිසංස්කරණය කරගැනීමට ප්‍රමාණවත් නොවුණ බව හිටපු පාර්ලිමේන්තු මන්ත්‍රී ප්‍රේම්නාත් සී. දොලවත්ත මහතා පවසනවා.
අද (07) සිය නිවසේ දී මාධ්‍ය හමුවක් කැඳවමින් හිටපු මන්ත්‍රීවරයා කියා සිටියේ කිසිදු රාජ්‍ය නිලධාරියෙකුට බලපෑම් කරමින් කිසිදු මුදලක් ලබාගෙන නොමැති බවයි.
තමන්ගේ නිවසෙහි සවිකර තිබූ ජනේල 40ක් තිබූ බවත්, ඒවා සියල්ලම විනාශ කර දැමුවේ අරගකරුවන් බවත්, ඒවා ප්‍රතිසංස්කරණය කිරීමට රජයෙන් ලබාගත්තේ රුපියල් 837000ක මුදලක් බවත් දොලවත්ත මහතා පවසනවා.
විරුද්ධ දේශපාලනයක් සිදු කෙරුව ද, විරුද්ධ මතධාරීන් විනාශ කළ ද, එය ස්වාභාවික ආපදාවක් නොවන බවයි හිටපු මන්ත්‍රීවරය පැවසුවේ.
එමෙන්ම හිටපු මන්ත්‍රීවරයා අමාත්‍ය නලින්ද ජයතිස්ස මහතාට ප්‍රසිද්ධ අභියෝගයක් ද සිදු කර තිබෙනවා.
ඒ මෙම හානි සම්බන්ධයෙන් නැවත රාජ්‍ය නිලධාරීන් එවා ගණනය කිරීම් සිදු කරන ලෙසයි.
අරගලයෙන් තමන්ගේ නිවසෙහි තිබූ කළුවර ලීයෙන් තැනූ පුටු 05ක් කඩා දැමූ බවත් ඉන් එකක් අම්බලන්ගොඩ නගරයෙන් පිළිසකර කරගැනීමට රුපියල් 275000ක මුදලක් වැයවන බව ද දොලවත්ත මහතා සඳහන් කළා.
ජාතික ජන බලවේගය පක්ෂයේ ඇමති නලින්ද මෙන් සෙසු පිරිසට ද අරගලයෙන් දේපොළ විනාශ වීම සුළු කරුණක් වනු ඇත්තෙ ඔවුන් බලයට ඒමට පෙර ජීවත් වූ ආකාරය නිසාවෙන් විය හැකි බව ද දොලවත්ත මහතා වැඩිදුරටත් පැවසුවා.
එය හුදෙක් ‘කූඹියෙක්ට හුජ්ජ ගංගාවක්’ වගේ යැයි යන්න ද ඒ මහතා කියා සිටියා.
