ශ්‍රී ලංකා ක්‍රිකට් ක්‍රීඩක කුසල් ජනිත් පෙරේරාගේ උරහිසේ සිදුකළ යුතු ශල්‍යකර්මය සඳහා ගෙවිය යුතු සම්පූර්ණ මුදල ලබාදීම ශ්‍රී ලංකා ක්‍රිකට් ආයතනය විසින් ප්‍රතික්ෂේප කිරීමේ සිද්ධිය සම්බන්ධයෙන් විපක්ෂ නායක සජිත් ප්‍රේමදාසගේ අවධානය යෝබුව තිබෙනවා.
සිය නිල ට්විටර් ගිණුමේ විශේෂ සටහනක් තබමින් විපක්ෂ නායකවරයා සඳහන් කරන්නේ දේශපාලනඥයින්ට හා නිලධාරින්ට විදේශ සංචාර සඳහා අනුග්‍රහය දැක්වීමට මුදල් ඇති බවත් රටට කීර්තියක් ගෙන දුන් ක්‍රීඩකයින්ගේ සෞඛ්‍යාරක්ෂණය වෙනුවෙන් වියදම් කිරීමට ඔවුන් ප්‍රතික්ෂේප කිරීම ගැටළුකාරී බවයි.
කුසල්ගේ උරහිසේ ශල්‍යකර්මය එංගලන්තයේදී සිදුකිරීමට නියමකර ඇති අතර ඒ සඳහා වැයවන මුදල් ඔහු විසින් ශ්‍රී ලංකා ක්‍රිකට් ආයතනයෙන් ඉල්ලා තිබෙනවා.
කෙසේ වෙතත් ක්‍රිකට් ආයතන ප්‍රධානීන් ඔහුට පවසා ඇත්තේ රක්ෂණාවරණයෙන් ලැබෙන මුදල පමණක් ලබාදෙන බවත් වැයවන ඉතිරි මුදල් සියල්ල කුසල් විසින් දැරිය යුතු බවටයි.
කෙසේ වෙතත් මේ සම්බන්ධයෙන් ඉදිරියේ දී කුසල්, ශ්‍රී ලංකා ක්‍රිකට් සභාපති ශම්මි සිල්වා හමුවී සාකච්ඡා කිරීමට නියමිත බවට තොරතුරු වාර්තා වුණා.
මෙවන් පසුබිමක මෙම වසරේ අග පැවැත්වෙන පන්දුවාර 20 ලක කුසලාන තරගාවලියට එක්වීමේ අවස්ථාව මෙම ප්‍රබල පිතිකරුවාට මඟ හැරීයාමේ අවධානමක් පවතිනවා.
