කරන්දෙණිය ප්‍රදේශයේ කුරුඳු ඉඩමක තිබී අබිරහස් ලෙස මියගිය පුද්ගලයෙකුගේ මළසිරුරක් හමු ව තිබෙනවා.
අප ප්‍රාදේශීය වාර්තාකරු පැවසුවේ; මෙම පුද්ගලයාගේ මළ සිරුර උණගස්වල ප්‍රදේශයේ කුරුඳු ඉඩමක තිබී සොයා ගැනුණු බවයි.
මෙම පුද්ගලයා ඊයේ (21) දිනයේ දී එම ඉඩමට පැමිණ ඇත්තේ කුරුඳු ඉඩම සුද්ද පවිත්‍ර කර උදුලු ගෑමට බවත් වාර්තා වනවා.
අදාළ කුරුඳු ඉඩම තුසයහකුරු ෂරෝකා නමැත්තෙකුගේ බවයි හෙළි ව ඇත්තේ.
ඔහු පැමිණ මළසිරුර හඳුනාගෙන ඇති අතර; පොලිසියට ලබාදුන් කට උත්තරයේ සඳහන් ව ඇත්තේ මෙම මියගිය තැනැත්තා ඊයේ දිනයේ දී සිය කුරුඳු ඉඩම උදුලු ගෑමට පැමිණි අයෙක් බවයි.
මියගිය පුද්ගලයාගේ ඥාතීන් ද පැමිණ සිරුර හඳුනාගෙන ඇති අතර; ඔහු කරන්දෙණිය – අනුරුද්ධගම පදිංචි අයෙක් බවත් හෙළි ව තිබෙනවා.
මෙම පුද්ගලයාගේ හිසෙහි සහ අත්වල තුවාල දක්නට ලැබෙන බවත්; පශ්චාත් මරණ පරීක්ෂණය සඳහා මෘත ශරීරය බලපිටිය මූලික රෝහලට ඇතුළත් කර ඇති බවත් අප ප්‍රාදේශීය වාර්තාකරු පැවසුවා.
